Алматы облысында табысты жұмыс істеп тұрған кәсіпорындар дамудың жаңа кезеңіне қадам басуда. Облыс әкімдігі олардың әлеуетін арттыру үшін қандай шаралар қабылдайды? Бұл туралы Алматы облысының әкімі Марат Сұлтанғазиев журналист Айбар Олжайға берген сұхбатында айтып берді, деп хабарлайды alataunews.kz.
Марат Сұлтанғазиевтің айтуынша, алдағы жылы Алматы облысында қарқынды даму күтілуде. Бүгінде аймақта KT&G, Лейс сияқты ірі компаниялар мен жергілікті «Алтын Таға» сияқты мекемелер өз жұмыстарын белсенді жүргізіп жатыр. «Алтын Таға» кәсіпорны алғашқы кезеңін аяқтап, өндірісін іске қосты, ал Ұйғыр ауданындағы «Прима Құс» және «Шинлайн» компаниялары екінші кезеңдерін жүзеге асырды.
Ауыл шаруашылығын дамыту – басты міндет
«Алматы облысы ауыл шаруашылығы бойынша жетекші өңір саналады. Біз бұл статусты сақтап қана қоймай, әрі қарай дамытуды жоспарлап отырмыз, себебі облыс халқының 84%-ы ауылдық жерлерде тұрады. Ауыл шаруашылығы үшін ең маңыздысы – су жүйелері. Келесі жылы министрлік тарапынан су жүйелерін қалпына келтіру жұмыстары басталады. Биыл біз 18 мың гектар жерді су үнемдеу технологиясына қостық. Алдағы жылы бұл көрсеткішті 50 мың гектарға жеткізуді жоспарлап отырмыз,» – деді әкім.
Әрбір аудан өзінің ерекшелігіне қарай мамандандырылмақ:
- Балқаш ауданы – мал шаруашылығы.
- Талғар және Еңбекшіқазақ аудандары – өсімдік шаруашылығы.
- Қалаға жақын аймақтар – түрлі бизнестер мен мемлекеттік бағдарламаларды дамыту.
Әкімнің айтуынша, барлық аудандар үшін мемлекеттік қолдау шаралары қарастырылған.
Марат Сұлтанғазиев Алматы облысының экономикасы мен ауыл шаруашылығының әрі қарай дамуы үшін нақты қадамдар жасалатынын атап өтті. Су ресурстарын тиімді пайдалану, кәсіпорындарды қолдау және мемлекеттік бағдарламаларды енгізу арқылы өңірдің әлеуметтік-экономикалық әлеуетін арттыру басты мақсаттардың бірі болып отыр.
