Жобаның басты мақсаты — заманауи және қолайлы білім беру ортасын қалыптастыру арқылы өңірдегі білім сапасын жаңа деңгейге көтеру.
2024-2025 оқу жылында облыстағы 437 мемлекеттік мектепте 352 856 оқушы білім алды. Бұл өткен жылмен салыстырғанда 11 059 оқушыға артық. Өңірдегі оқушылар санының тұрақты өсімі жаңа білім беру нысандарына деген сұранысты арттырып отыр.
Осы қажеттілікті өтеу мақсатында 2024 жылы «Жайлы мектеп» жобасы шеңберінде 11 100 оқушыға арналған 9 мемлекеттік және 3 275 орындық 3 жекеменшік мектептің құрылысы аяқталып, пайдалануға берілді. Бұған дейін, 2023 жылы, 14 400 орындық 14 мектеп салынған болатын.
Аталған шаралардың нәтижесінде үш ауысымды мектептердің саны 52-ден 30-ға дейін азайған. Бұл білім сапасына оң ықпал етіп, оқушылардың оқу процесін біріздендіруге мүмкіндік беруде.
Қазіргі таңда облыс аумағында 17 мектептің құрылысы жалғасуда. Оның ішінде, Қарасай ауданындағы «Асыл арман» тұрғын үй кешенінде жекеменшік инвестордың қаражаты есебінен 2 000 орындық мектеп салынып жатыр. Құрылыс жұмыстары 2025 жылдың қыркүйегінде аяқталады деп жоспарланған.
Сонымен қатар, Іле ауданына қарасты Өтеген батыр, Байсерке және А.Тоқпанов ауылдарында әрқайсысы 1 500 орынға арналған жаңа мектептердің құрылысы 2025-2026 жылдарға жоспарланып отыр.
Алматы облысы білім басқармасының басшысы Салтанат Беспаева бұл бастаманың елдің білім беру жүйесін жаңа сапалық деңгейге көтеруге арналған нақты қадам екенін атап өтті.
«Келешек мектептері жай ғана мектеп ғимараттары емес, болашаққа жасалған берік инвестиция. Білім — ұлттың іргетасы, ал бұл мектептер сол іргетасты нығайтатын басты тірек болмақ», — деді ол.
«Келешек мектептері» жобасының жүзеге асуы өскелең ұрпаққа қолайлы және заманауи білім беру ортасын қалыптастырып, облыстың білім беру жүйесінің тұрақты дамуына серпін бермек.
