Жиында биыл апатты және тозығы жеткен үйлерді бұзу жұмыстары және 2029 жылға дейін азаматтарды көшіру жолымен «ескі» кварталдарды кешенді қайта құру мәселесі талқыланды.
Басқосуға кеңес төрағасы Лаззат Тұрлашов, облыстық партия филиалының төрағасы Қуат Байғоджаев, депутаттар және барқарма басшылары қатысты.
Облыстық энергетика және ТҮКШ басқармасының басшысы Асхат Бердіхановтың айтуынша өңірде 27 ескі тұрғын үй анықталған.
«Алматы облысында 2 мыңнан аса көпқабатты тұрғын үй бар. Оның ішінде апатты және тозығы жеткен 27 үй деп танылды. Биыл Қонаевта Октябрь көшесіндегі төрт үйді бұзу жоспарланған. 32 пәтердің тұрғындарына басқа жаққа қоныс аударуы үшін жергілікті бюджеттен 595 млн теңге бөлінді», – деді Асхат Бердіханов.
Сонымен қатар, Алматы облысының әкімдігі өңірде тозығы жеткен тұрғын үйлерді түбегейлі жаңарту мақсатында тартылатын қаражатты біріктіру және «револьверлік» әдіспен пәтерлерді сатудан түскен пайданы қайта инвестициялау жолымен жеке бағдарлама әзірлеу жұмыстарын жүргізіп жатыр.
Айта кету керек, аталған жоба аясында облыстық бюджеттік комиссия 4,4 млрд теңге сомасын мақұлдады. Бұл өңірдегі 355 (4 879 пәтер) үйді қамтиды.
