Спикердің сөзінше, дауыс беру орындары картада белгіленеген.
«Қазіргі таңда сайлау учаскелерінің мекенжайларын танымал 2GIS, Yandex Maps қосымшаларына енгізу жұмыстары жүргізілуде. Жұмыс аяқталуға жақын. Сайлау күні жақындаған кезде кез келген сайлаушы өз сайлау учаскесінің геолокациясын таба алады», — деді Жанна Асанова.
Айтуынша, қазіргі уақытта мегаполисте 531 сайлау учаскесі ашылды.
«Сайлау учаскелерінің мекен-жайы көрсетілген толық тізім «Вечерний Алматы» және «Алматы ақшамы» газеттерінің баспа нұсқаларында, олардың сайттарында, сондай-ақ Алматы қаласы әкімдігінің сайтында жарияланған», — деді ол.
Сонымен қатар, Алматыда өз сайлау учаскесін тексеру үшін «1315» бірыңғай нөмір құрылды. Барлық ұялы байланыс операторларының абоненттері үшін қоңырау шалу тегін. Call-орталықтың жұмыс уақыты – демалыс күндерін қосқанда күн сайын 8:00-ден 20:00-ге дейін.
«Алматы қаласы әкімдігінің «Open Almaty» қоғамдық қабылдау сайтында және білім басқармасының мемлекеттік қызметтер порталында сайлаушылар тізімдерінен өзіңізді тексеруге мүмкіндік беретін сервис қолжетімді. Зағип сайлаушылар үшін арнайы трафареттер дайындалады. Сондай-ақ ерекше қажеттіліктері бар адамдарға арналған бұрыштар жабдықталады: бейнероликтер, ақпараттық материалдары бар аудио роликтер және мүгедектер арбасына кіруге арналған кеңейтілген орындар», — деді спикер.
