Биыл 22 қыркүйекте «Дубай-Алматы» рейсін кедендік бақылау кезінде жеке тұлғаның декларацияланбаған 34 дана iPhone 15 телефонын заңсыз әкелу дерегінің жолы кесілді. Телефондардың алдын-ала есептелген кедендік құны – 25,3 млн теңге, келтірілген шығын көлемі – 3,1 млн теңге.
Заң бұзушылықты Алматы қаласының «Жетісу» кеден бекетінің мамандары, Алматы қаласы бойынша Экономикалық тергеу департаментінің және ҰҚК Шекара қызметі Алматы шекаралық бақылау басқармасының қызметкерлерімен бірлесіп, Алматы қаласы Авиациялық көлік прокуратурасының үйлестіруімен анықтады.
Ұялы телефондар жеке тауарлар санатына жатады және жеке тұлғалар оны кедендік шекара арқылы өткізген кезде олардың саны бір адамға екі данадан аспауға тиіс (Қаржы министрлігінің 2015 жылғы 31 наурыздағы №250 бұйрығы).
Тәркіленген тауарлар кедендік рәсімдеуден өту және рұқсат құжаттарын жасату үшін уақытша сақтау қоймасына жіберілді.
Ұялы телефондарды декларациялаусыз әкелуге әрекет жасаған адамға Әкімшілік құқықбұзушылық туралы кодекстің 551-бабы 1-бөлігіне сәйкес 103,5 мың теңге (30 АЕК) айыппұл салынады.
МКК Алматы қаласы бойынша департаменті қазақстандықтарды Алматы халықаралық әуежайының жолаушылар терминалында тыйым салынған және шектелген тауарларға, оның ішінде әскери және қосарлы мақсаттағы тауарлардың қозғалысына кедендік бақылаудың күшейгенін ескертеді.
