Өңірде өндірілген өнеркәсіп өнімінің жалпы көлемі 2 трлн 110,7 млрд теңгені құрады. Оның 90 пайызы — өңдеу өнеркәсібінің үлесі, бұл Қазақстан бойынша ең жоғары көрсеткіштердің бірі саналады. Азық-түлік өндірісі саласында облыс көкөніс шырындары, алкогольсіз сусындар, балмұздақ, шарап, коньяк және ірімшік өндірісінде көш бастап тұр. Темекі өнеркәсібінде де өңір елдегі негізгі орталыққа айналған: мұнда «JTI» мен «Philip Morris» компаниялары жұмыс істейді, ал 2025 жылы кореялық KT&G компаниясының жаңа темекі зауыты іске қосылды.
Бұдан бөлек, облыс гипсокартон, сэндвич-панельдер, болат құбырлар мен профильдер өндірісінде де маңызды орынға ие. Логистикалық инфрақұрылым жаңартылып, жаңа тарату орталықтары ашылып жатыр.
Өңірде бірқатар ірі инвестициялық жобалар жүзеге асуда. Соның ішінде Oрталық Азиядағы Lay’s чипстерін шығаратын ең ірі зауыттың құрылысы бар. Жоба құны – 71 млрд теңге, өндірісте жергілікті шикізат қолданылады. Сонымен қатар LC Waikiki компаниясы 30 млрд теңгеге көтерме-тарату орталығын салып жатыр. Ал Qazaq Global Food компаниясы жеміс-жидекті терең өңдейтін 16,5 млрд теңгелік зауытты іске қосты. Бұл өндірістер импортты алмастыруға, ішкі нарықты сапалы өніммен қамтамасыз етуге және экспортты арттыруға мүмкіндік береді.
Өңдеу өнеркәсібінің экспорттық көрсеткіші де айтарлықтай өскен. 2025 жылы экспорт көлемі 618,5 млн долларға жетіп, өткен жылмен салыстырғанда 28,5 пайызға артты. Әсіресе сусындар, азық-түлік, темекі, қағаз, химия, пластмасса және құрылыс материалдары экспортының өсімі байқалған.
Өңірдегі табысты өндірістердің бірі — Кайнар ауылдық округіндегі TTS Global Groups компаниясы. Зауыт 2022 жылы кәсіпкерлер Нұрғали Әбдікерімов пен Зұлфинар Құнанбайдың бастамасымен құрылған. Қазіргі уақытта кәсіпорын сылақ, шпаклевка, плитка желімі, құйылмалы еден және декоративті қоспалар сияқты 35-тен астам өнім түрін шығарады. Жылдық өнім көлемі 3,7 млн қаптан асады. Өндіріс толық автоматтандырылған, бір ауысымда 9 мың тоннадан астам өнім шығара алады. Сонымен қатар сағатына 30–35 мың тонна қоспа өндіретін жаңа түрік жабдығы іске қосылған. Шикізат бірнеше кезеңдік тексеруден өтеді, ал қоспалар эконом, орта және премиум санаттарында өндіріледі.
Компания келесі жылы «ақ желі» деп аталатын жаңа зауыт салуды жоспарлап отыр. Онда шпаклевка, затирка және басқа да ақ түсті құрылыс материалдары шығарылады. Қазір кәсіпорында 70 қызметкер жұмыс істейді. Өндіріс кеңейген сайын жаңа жұмыс орындары ашылады. «Берік өндіреміз, үздікпен жұмыс істейміз!» деген ұстаным компанияның сапаға деген жауапкершілігін көрсетеді.
TTS Global Groups-тың дамуы шағын және орта бизнестің де Алматы облысының өнеркәсіп секторына елеулі үлес қосып отырғанын дәлелдейді.
