Семинардың негізгі мақсаты – жергілікті тауар өндірушілердің халықаралық нарықтардың қазіргі заманғы талаптарына бейімделуіне көмектесу және өнімдерін шетелге табысты экспорттауға жағдай жасау.
Экспорттаушылар қауымдастығының мәліметінше, бүгінде Қазақстан экспорты жалпы тауар айналымының 65,1%-ын құрайды, оның басым бөлігі минералды өнімдер мен металдарға тиесілі.
Семинар барысында қатысушылар халықаралық стандарттардың заманауи талаптары, өнімді аккредитациялау және сертификаттау рәсімдері, жеткізілімнің логистикалық аспектілері мен мемлекеттік қолдау тетіктері бойынша білім алды. Сонымен қатар, экспорттық қызметтегі салық, кедендік рәсімдеу және шетелдік нарықтарға шығудағы тәуекелдерді төмендету мәселелеріне ерекше назар аударылды.
«Бүгінде экспорттық қызмет тек өнім сапасын ғана емес, сонымен қатар заңдық және экономикалық тұрғыдан сауатты жүргізуді де талап етеді. Біз кәсіпкерлерге халықаралық нарықтарға шығудың тиімді стратегияларын меңгеруге, шығындарды азайтуға және сенімді серіктестер табуға көмектесеміз», – деп атап өтті Қазақстан Республикасының Экспорттаушылар қауымдастығының төрайымы Гүльмира Юсупова.
Өз кезегінде, Алматы облысының өңірлік дамыту орталығының экспортты дамыту бөлімінің басшысы Нұртас Мелдехан мұндай семинарлардың өңірдің экспорттық әлеуетін дамытудағы маңыздылығын атап өтті.
«Кәсіпкерлердің біліктілігін арттыру және заманауи тәжірибелерді енгізу экспорт көлемінің өсуіне ғана емес, сонымен қатар қазақстандық өнімнің жаһандық нарықта бәсекеге қабілетті болуына ықпал етеді. Біз, өз кезегімізде, Алматы облысының тауар өндірушілеріне экспорттық жеткізілімдерді ұйымдастыруда жан-жақты қолдау көрсетуге дайынбыз. Өңірлік дамыту орталығы экспорттаушыларға шетелдік компаниялармен әріптестік орнатуға және халықаралық нарықтарға сәтті шығуға белсенді түрде жәрдемдесуде», – деп қорытындылады Нұртас Мелдехан.
