Алматы облысы әкімдігінде өткен кеңесте өңірдің ағымдағы жылдың тоғыз айындағы әлеуметтік-экономикалық даму көрсеткіштері талқыланды, деп хабарлайды Alataunews.kz.
Оған облыс әкімі Марат Сұлтанғазиев қатысып, өңірдің негізгі жетістіктері мен алдағы міндеттерге тоқталды.
Облыс әкімінің орынбасары Рүстем Исатаевтың айтуынша, өңір экономикасының барлық маңызды секторларында оң динамика байқалған. Қысқа мерзімді экономикалық индикатор 108,6%-ға жетіп, өңір республика бойынша 8-орынға көтерілді. Өнеркәсіп өндірісі 105,4%-ға өсіп, бұл республикадағы орташа көрсеткіштен жоғары болды. Сондай-ақ, үш тоқсан ішінде экономикаға тартылған инвестиция көлемі 32,8%-ға артып, 615 млрд теңгені құрады. Бұл облыс әкімдігінің қолдауымен инвесторлардың жоғары сенімін білдіреді.
Экономиканың негізгі драйверлеріне өңдеу өнеркәсібі, вольфрам өндіру, металл бұйымдары мен қағаз өндірісі жатады. Дегенмен, өндірістік қуаттардың толық пайдаланылмауы мәселесі өзекті болып отыр. Өңдеу өнеркәсібін, әсіресе агроөнімдерді өңдеуді дамыту және дайын өнім шығаруды көбейту қажет.
Сауда және құрылыс салаларында да өсім байқалды. Сауда көлемі 107,2%-ға, ал құрылыс саласы 127,2%-ға өскен. «Ауыл аманаты» және «Ауыл – Ел бесігі» бағдарламалары аясында ауыл инфрақұрылымын жақсарту жұмыстары белсенді жүргізілуде.
Облыстағы кейбір бағыттарда оң көрсеткіштерге қарамастан, шешімін күткен мәселелер бар. Марат Сұлтанғазиев ауыл шаруашылығы өнімдерін өңдеу және бюджет қаражатын тиімді пайдалану қажеттігін атап өтті. Құрылыс және шағын бизнесті қолдау арқылы жұмыс орындарын көбейту, сондай-ақ су ресурстарын тиімді пайдалану мақсатында су үнемдеу технологияларын кеңейту жоспарлануда.
Әкім өңірде бюджет қаражатын игеру және әлеуметтік-экономикалық тұрақтылықты қамтамасыз ету бағытында қабылданып жатқан шараларды қадағалауды тапсырды.
