Мәскеулік нарықта 15 жылдық тәжірибесі бар компания талшықты-оптикалық желілерді орналастырумен айналысады. Сондай-ақ олар жол қауіпсіздігін қамтамасыз ету үшін де арнайы жобаларды жүзеге асырып келеді.
Аталған компания қолға алған кезекті жоба «Ақылды қала» деп аталады. Жауаптылардың сөзіне сүйенсек, Алматы облысы әкімінің назарына ұсынған бұл жобаның артықшылықтары көп. Олар «Ақылды қала» арқылы 100-ден астам қызмет түрін ұсына алатындарын жеткізді.
Атап айтар болсақ, жоба адамдар қауіпсіздігін қамтамасыз ету, техникалық, әлеуметтік басқару тиімділігін арттыру, инфрақұрылым жағдайын жақсартуға мүмкіндік береді.
«Қауіпсіз аула» жүйесін енгізу де компания ұсынатын қызметтер қатарына кіреді. Ал «ақылды жарық» жүйесін пайдалану электр энергиясына кететін шығындарды 65 пайызға дейін қысқартуға мүмкіндік береді», — дейді «Метромакс» компаниясының бас директоры Дмитрий Петров.
Ал жоғарыда аталған жобаны табысты жүзеге асыру үшін арнайы бағаналар орнатудың маңызы өте зор.
«Көше қиылыстарында орналастырылатын бұл мұнаралар үкіметтік бағдарлама бойынша бейнебақылау және бейнетіркеу камераларын қоюға ыңғайлы. Сонымен қатар оған азаматтарды құлақтандыру және авариялық қызметтерді шақыру жабдықтарын орналастыру, қолжетімді ашық Wi-Fi желісін орнатуға болады», — дейді маман.
Компания өкілдерін тыңдаған облыс басшысы Марат Сұлтанғазиев алдағы уақытта пилоттық жоба іске қосылатынын жеткізді.
«Әрине, жоба тың әрі қызық. Ең алдымен екі жақты Меморандум дайындалып, бас құжатқа негізгі жұмыс барысын енгізейік. Содан кейін облыстық Цифрлық даму басқармасы мен Полиция департаментінің қатысуымен бірлесе отырып, пилоттық жобаны іске қосамыз», — деді Марат Сұлтанғазиев.
