Аудан-қаладағы, шалғай жатқан ауылдардағы жасақшылардың барлығы Қонаев қаласына шақырылып, маусымның салтанатты ашылуы өтті. Биыл 19 жылдық дәстүрге сай, жобаны материалдық-техникалық жарақтандыруға қаражат бөлініп, жасақшылар арнайы формамен қамтылған.
«Жасыл ел» еңбеккерлері жыл бойы экологиялық акцияларға қатысып, өңірді тазартумен қатар абаттандырумен айналысады. Сонымен қоса, қоғамдық жұмыстарға тартылып, түрлі қайырымдылық шараларына атсалыспақ.
«Биыл 1200 жасты жұмыспен қамтып отырмыз. Көбіне еңбек жасақтары Кеген, Райымбек аудандарында құрылып отыр. Біз тек экологиялық акциялармен емес, қайырымдылық шараларымен де айналысатын боламыз. Жобамыз көп», — деді облыстық жастар ресурстық орталығы директорының міндетін атқарушы Балжан Досалы.
Бүгінде топқа мүше болған жастар қоғамдық жұмыстарға дайын. Экологиялық акцияларға білек-сыбана кіруге әзір екендерін айтады.
«Менің жеке кәсібім бар. Бұған дейін мүгедек жандарға қайырымдылық жасадым. Балам бар. Алда осындай экологиялық бағдарламаға қатысу үшін осында келдім», — деді жасақ мүшесі Артем Уйгуров.
Кеш көрермендері үшін Мұзарт тобының мүшесі Кенжебек Жанабілов және жас әншілер Нұрмұхаммед Жақып, Baygun өнер көрсетті. Мұнымен қоса, кеш көрігін «Рабат» этно-ансамблі қыздырды.
Жалпы бұл бағдарламаға 14 жастан бастап мектеп оқушылары, студенттер және 35 жасқа дейінгі жұмыссыз жастар қатыса алады.
