Соңғы үш жылда өңірдегі медициналық мекемелердің заманауи техникамен қамтамасыз етілу деңгейі 79 пайыздан 92 пайызға дейін өсті.
2024 жылы облыстың денсаулық сақтау мекемелері 239 бірлік медициналық техникамен және 15 санитарлық автокөлікпен толықтырылды. Ал 2025 жылы жергілікті бюджеттен 3,4 млрд теңге бөлініп, барлығы 347 бірлік медициналық техника сатып алу жоспарланып отыр. Оның ішінде 1 магнитті-резонанстық томография (МРТ) аппараты, 1 ангиограф, 10 бейнеэндоскопиялық кешен, 2 маммограф және 2 сараптамалық деңгейдегі ультрадыбыстық зерттеу (УДЗ) аппараты бар.
Сонымен қатар, Жаһандық қордың қолдауымен Алматы облыстық фтизиопульмонология орталығы 51,5 млн теңге тұратын жаңа рентген аппаратымен жабдықталды.
Алматы облысы Денсаулық сақтау басқармасының басшысы Ержан Сүлейменовтің айтуынша, өңірдің медициналық инфрақұрылымын жетілдіру жұмыстары кезең-кезеңімен жалғасын табады.
«Медициналық техникамен жабдықтау – тұрғындарға сапалы әрі уақытылы медициналық көмек көрсетудің басты кепілі. Соңғы жылдары бұл бағытта айтарлықтай ілгерілеу байқалды. Жаңа жабдықтар диагностика мен емдеу тиімділігін арттырады. Алдағы уақытта бұл жұмысты одан әрі жандандырамыз», – деді Ержан Сүлейменов.
