Облыстық әкімдіктің мәліметінше, акцияға 800 мыңға жуық тұрғын және 8 836 кәсіпорын мен ұйым қатысқан. Тазалық шараларына барлығы 4 мыңға жуық арнайы техника жұмылдырылып, нәтижесінде 11 мың тоннадан астам тұрмыстық қалдық жиналды.
Сонымен қатар, өңір бойынша 109,8 мың ағаш егілді. Тазарту жұмыстары 3 048 көпқабатты үйдің ауласында, 55 саябақ пен скверде, 1 090 тарихи-мәдени ескерткіште және 1 055 әлеуметтік нысанда жүргізілді.
Облыстық тұрғын үй-коммуналдық шаруашылық және абаттандыру басқармасының көгалдандыру және абаттандыру бөлімінің басшысы Бекзат Кәрімов акцияның нәтижелері туралы былай деді:
«“Таза Қазақстан” республикалық экологиялық акциясы аясындағы іс-шаралар жоспарға сәйкес орындалуда. Онлайн-платформа арқылы да жұмыс жүргізілуде. Бүгінгі күнге дейін Telegram-ботқа 1123 өтініш келіп түсті, оның 880-і орындалды, 233-і кері қайтарылды, ал 10-ы орындалу үстінде. Бүгін осы жылғы соңғы сенбілікті өткіздік. Ауа райының қолайсыздығына байланысты жұмысты келесі жылы жалғастырамыз», – деді ол.
Акцияға қатысушылардың бірі Ермек Ибрагимов та экологиялық бастаманың маңызын атап өтті:
«Бүгін әріптестерімізбен бірге сенбілікке қатыстық. Мұндай шаралардан қалыс қалып көрген емеспіз. Еліміздің таза болуына әрбір азамат өз үлесін қосуы қажет», – дейді ол.
Айта кетейік, «Таза Қазақстан» акциясы өңірлерде жыл бойы жалғасып келеді. Келесі жылы да абаттандыру және көгалдандыру жұмыстары кең көлемде жалғастырылмақ.
