Әкімнің айтуынша, биыл облыста 570 шақырым сумен жабдықтау жүйесі салынып, қайта жаңартылады. Бұл жұмыстардың нәтижесінде таза ауыз сумен қамту деңгейі 99,6%-ға жетеді (2024 жылы – 93,6%).
Сонымен қатар газбен жабдықтау жұмыстары да белсенді жүргізіліп, 1,2 млн астам тұрғын (2024 жылы 1,08 млн тұрғын) көгілдір отынмен қамтамасыз етіледі. Электр желілеріне бөлінген қаражат есебінен тозу көрсеткіші 72%-дан 66 %-ға түсті.
Сұлтанғазиев жол сапасына да ерекше тоқталды. Оның айтуынша, нормативтік талапқа сай келетін жолдардың үлесі биыл 95%-ға жетеді (2024 жылы – 94%).
2000 жылдардан бері жөндеу көрмеген автомобиль жолдары қайта жаңартылды. Мәселен, «Қапшағай – Бақанас – Қарой», «Нарынқол – Сүмбе», «Қарқара – Ереуіл», «Есік – Саймасай», «Алматы-1 – Шамалған – Ұзынағаш», «Алмалыбақ – Жетісу» автомобиль жолдарының негізі ауыстырылып, жаңа асфальт жамылғысы төселді.
