Бір алаңда олимпиада жүлдегерлері, әлем чемпиондары, спорт ардагерлері, жаттықтырушылар және жас спортшылар бас қосты.
Мереке Жақсылық Үшкемпіровтің аңызға айналған жеңісін бейнелеген театрландырылған қойылыммен ашылды. Одан кейін спорт ардагерлері, жаттықтырушылар мен дене шынықтыру саласының үздік мамандарына марапаттар табысталды.
Облыс әкімі Марат Сұлтанғазиев өз сөзінде спортшылардың жетістіктері жүйелі қолдау мен ынталандырудың арқасында мүмкін болып отырғанын атап өтті.
«Спорт – ұлт рухын көтеретін күш. Өңірде спорт саласын дамытуға ерекше көңіл бөлінеді. Жоғары нәтижеге жеткен спортшылар ай сайын стипендия алады, ал «Алатау» клубының жұмысы арқасында қосымша төлемдер беріледі. Сондай-ақ, спорт саласының мамандары мен үздік спортшылар «Отбасы банк» арқылы жеңілдетілген ипотекалық несие рәсімдей алады. Бұл – олардың еңбегіне берілген әділ баға әрі жаңа жеңістерге ынталандыру», – деді әкім.
Соңғы жылдары Алматы облысының спортшылары халықаралық ареналарда жарқын жетістіктерге қол жеткізді. Париж олимпиадасында Демеу Жадраев күміс медаль иеленсе, Харбинде өткен қысқы Азия ойындарында Асет Дүйсенов жүлделі орындарға көтерілді. Боксшылар мен ауыр атлеттер Азия және әлем чемпионаттарында алтыннан алқа тақты.
Бұқаралық спорт та қарқынды дамуда. 2024 жылдан бері «Алатау лигасы» аясында ауылдық округтерде 140 клуб ашылып, футбол, баскетбол, волейбол және үстел теннисі бойынша 318 команда құрылды. Бұл жоба ауыл жастары арасынан жаңа спорт жұлдыздарын анықтап қана қоймай, мыңдаған тұрғынды салауатты өмір салтына баулуда.
