Осыған орай, Алматы облысының өңірлік коммуникациялар алаңындағы кезекті брифинг тарифтердің бағасы тақырыбында өтті.
Өңірдегі табиғи монополияларды реттеу департаментінің басшысы Барлық Төрехановтың айтуынша, облыста тауарлы газдың бағасы мың метр кубқа 22 413 теңгеден 25 103 мың теңгеге өскен. Мысалы, «Алматыгазсервис-Холдинг» АҚ субъектісінде газ бағасы 24082,77 теңгеден 26404,35 теңгеге (9,64 %) қымбаттады.
Ал электрэнергиямен қамту бағасы 1 шілдеге дейін 22,18 теңге болса, кейін 24,76 құрады. Яғни, «Алатау Жарық Компаниясы» АҚ-ның көрсететін қызметі қымбаттауына байланысты тариф 11,63% өсті. Бұдан бөлек, «Алматыэнергосбыт» ЖШС-де ток бағасы 19,48 теңгеден 19,67 теңгеге көтерілді.
«Мұның барлығы «Тарифтерді инвестицияға айырбастау» жобасы шеңберінде жасалып отыр. Мұндағы мақсат – өңірдегі электр қуатымен қамтамасыз ету және су құбыры желілерінің, жылу коммуникациясының тозу деңгейін төмендетуге қол жеткізу», — деді департамент басшысы.
Алматы облысында су желілерінің тозуы 28 пайыздан бастап («Ұйғыр су құбыры» КММ) 80 пайызға дейін («Қонаев су арнасы», «Талғар су», «Жамбыл су» КММ-лері) жетеді. Бұдан бөлек, «Жылу орталығы» КММ-нің 42%, «Тепловые сети» ЖШС-нің 48% жылу желісі тозған. Газ желісі тозу бойынша ең көп үлес «ҚазТрансГазАймақ» АҚ-на тиесілі – 33,6%. «Алатау Жарық Компаниясы» АҚ-ның электр желілерінің тозуы 93%-дан асады.
Айта кетейік, облыста 102 монополиялық субъект тіркелген. Жыл басынан бері департамент кезектен тыс 9 тексеру жүргізген. Оның 6-на 15 хаттама толтырылып, 2-не әкімшілік іс қозғалған.
