Есірткі қылмысына қатысы бар деген күдікпен 41 жастағы азамат ұсталып, сот санкциясымен қамауға алынды.
Алматы облысы Полиция департаментінің Есірткі қылмысына қарсы іс-қимыл басқармасы қызметкерлері ҚР Ұлттық қауіпсіздік комитетінің Алматы облысы бойынша департаментімен бірлесіп жүргізген жедел-іздестіру шаралары барысында күдіктіні Қарасай ауданына қарасты Тұрар ауылындағы фазенда аумағында қолға түсірген.
Полиция мәліметінше, жеке тінту кезінде ер адамның бойынан қолдануға дайын, кептірілген өсімдік тектес заттың шамамен 10 грамы табылып, тәркіленген.
«Алдын ала мәлімет бойынша, бұл есірткі заты болуы мүмкін», – деп хабарлады есірткіге қарсы қызмет өкілдері.
Одан бөлек, іргелес аумақты тексеру барысында шаруашылық құрылыстарының бірінен есірткі құрамды өсімдіктерді өсіруге арнайы жабдықталған бөлме анықталған. Нәтижесінде қарасора түптері, кептірілген өсімдік заты салынған ыдыстар мен қаптамалар, сондай-ақ өсімдіктерді өсіруге арналған тыңайтқыштар тәркіленді.
Ведомство өкілдерінің айтуынша, күдіктінің тұрғылықты жерін тінту кезінде де бірқатар айғақ заттар табылған.
«Тінту барысында өсімдік тектес заты бар шыны банкалар, кептіру жабдықтары, өсімдік қалдықтарының іздері бар электронды таразылар, қаптама материалдары және есірткі құралдарын қолдануға арналған заттар алынды», – деп мәлімдеді полиция.
Сот-химиялық сараптама қорытындысына сәйкес, тәркіленген өсімдіктер мен заттар жалпы салмағы шамамен үш келі болатын есірткі заты – марихуана деп танылған.
Күдікті өз кінәсін мойындаған. Қазіргі уақытта оқиға бойынша қажетті тергеу іс-шаралары жүргізіліп жатыр.
