Жыл қорытындысы бойынша инвестициялық ынтымақтастық пен бірлескен жобаларды іске асыруға қатысты 40 меморандумға қол қойылған. Құжаттарда көзделген инвестициялардың жалпы көлемі 1,2 триллион теңгеден асады. Келісімдер облыс экономикасының негізгі салаларын, соның ішінде өнеркәсіп, логистика, өңдеу секторлары мен инфрақұрылымды дамыту бағыттарын қамтиды.
Меморандумдардың бір бөлігі халықаралық кездесулер аясында, сондай-ақ Алматы облысының әкімдігі басшылығының ресми шетелдік сапарлары кезінде бекітілген. Бұл шетелдік компаниялармен тікелей байланыс орнатуға, серіктестік тетіктерін нақтылауға және өңіраралық ынтымақтастықты тереңдетуге мүмкіндік берді.
Өңір үшін халықаралық инвестициялық әріптестікті дамытудың басты өлшемі – нақты нәтиже мен экономикалық тиімділік. Осыған байланысты негізгі мақсат – жасалған келісімдерді қағаз жүзінде қалдырмай, оларды нақты іске асатын инвестициялық жобаларға айналдыру.
Қазіргі таңда қол қойылған әрбір меморандум бойынша жүйелі жұмыс жүргізілуде. Жобалардың шарттары пысықталып, жүзеге асырылатын алаңдар айқындалуда, сондай-ақ іске асыру кезеңдері белгіленіп жатыр. Мұндай тәсіл инвестициялық келісімдердің орындалуын қамтамасыз етіп, Алматы облысы экономикасына нақты пайда әкелуге бағытталған.
