Тергеу мәліметінше, Еңбекшіқазақ ауданының тұрғыны OLX платформасында жарияланған «онлайн-төлемдер операторы» туралы жалған хабарландыруға алданып, өзінің банк картасын алаяқтардың пайдалануына берген.
Қыркүйек айынан бері оның шотына 2 миллион теңгеден астам қаржы түскені анықталды. Әйел соның 5 пайызын «комиссия» ретінде алып отырған, ал қалған қаражат алаяқтардың есепшоттарына аударылып отырған.
Прокуратура мұндай тәсілдің алаяқтар арасында кең тарағанын ескертеді. Қылмыскерлер ұрланған қаржыны заңдастыру үшін өз реквизиттерін пайдалануға келіскен адамдарды әдейі іздейді. 2025 жылғы 16 қыркүйектен бастап «дропперлік» — қылмыстық жауапкершілік қарастырылған әрекет. Заң бойынша мұндай іс үшін 7 жылға дейін бас бостандығынан айыру жазасы көзделген.
Қазіргі уақытта Еңбекшіқазақ аудандық полиция басқармасы тиісті тергеу әрекеттерін жүргізіп жатыр.
Прокуратура тұрғындарға банк карталарын, ПИН-кодтарын, логин және паролдерін бөгде адамдарға бермеуді, сондай-ақ жеке деректерді белгісіз интернет-ресурстарға енгізбеуді ескертті.
