Ведомство таратқан ақпаратқа сәйкес, есепті кезеңде мемлекеттік бюджетке 1 трлн 21,3 млрд теңге көлемінде салықтар мен төлемдер түскен. Оның 452,8 млрд теңгесі республикалық бюджетке, 568,5 млрд теңгесі жергілікті бюджетке бағытталған. Бұл өткен жылдың сәйкес кезеңімен салыстырғанда 111,4 пайыз өсім, яғни 104,4 млрд теңгеге артық.
Алматы облысы соңғы жылдары бюджетке түсетін кірістердің тұрақты өсу қарқынын көрсетіп келеді. Бюджеттің кіріс бөлігі жыл сайын жүйелі түрде артып отыр. Соңғы бес жылда түсімдер көлемі 666,8 млрд теңгеден 1 триллион теңгеден асқан деңгейге дейін өсіп, 1,5 еседен астам ұлғайған.
Биыл облыс алғаш рет тарихи межеден өтті, бюджетке түсімдер көлемі 1 триллион теңгеден асты. Бұл өңірдің әлеуметтік-экономикалық дамуындағы маңызды кезең және салық базасын кеңейту, кәсіпкерлікті қолдау бағытында жүргізілген жұмыстың тиімділігін көрсетеді.
Мемлекеттік кірістер департаментінің мәліметінше, түсімдердің артуы өңірдің қаржылық тұрақтылығын күшейтеді және экономика өсімін жеделдетуге, әлеуметтік бағдарламаларды кеңейтуге, басым жобаларды іске асыруға қосымша мүмкіндік береді.
