Аталған басқосуға комиссия мүшелері мен арнайы бақылаушылар және шағын несие алуға үмітті аудан мен қаладан келген жастар қатысты. Отырысты Алматы облысы әкімнің бірінші орынбасары Нұрлан Әбдірахым жүргізді.
Айта кетейік, қазіргі таңда облыс бойынша 22 жас бизнес жобаларын ұсынып үлгерген.
Жалпы жастардың үздік идеяларын қолдауға мемлекеттен 2 млрд. теңгеге жуық қаржы қарастырылған. Жоспар бойынша 375 кәсіпкерге несие беру көзделген. Түрлі бағыттағы бизнес түрлерін қолдауға арналған несие көлемі 5 млн. теңгені құрайды.
Мемлекеттен қолдау алуға үмітті жастардың бірі Бекзат Әділбекова. Ол өзінің бизнес жобасын комиссия мүшелерінің алдында қорғады. Оның негізгі бағыты балабақша ашу. Іле ауданы Түймебаев ауылының тұрғыны аталған аймақтан аумағы 360 шаршы метр екі қабатты ғимаратты дайындаған. Ендігі кезекте ішкі жиһаздары мен ас үй жабдықтарын алуға жеңілдікпен несие алуға мүдделі болып отыр.
«Екі қабатты ғимараттты өз күшімізбен салдық. Бүгінгі күні балабақша 80 пайызға дайын тұр. Ендігі қалғаны ішін жабдықтау. Осыған мемлекеттен қолдау тапсақ игі болар еді», — дейді жас кәсіпкер Бекзат Әділбекова.
Кәсіптен нәсіп тапқысы келгендердің қатарында Еңбекшіқазақ ауданының тұрғыны Маржан Жүсіпбекова да бар. Ол таңқурай өсірумен айналыспақ.
«5 млн. теңге қаражатқа 16 500 түп таңқурай алу ойда бар. Алғашқы жылы бір гектар жерді жалға алмақпын. Өнімді кейін, ірі сауда орындарына өткіземін деген ниеттемін. Жидектерді мұздатылған күйінде нарыққа ұсыну жоспарда бар. Алғашқы жылы бір гектар алқаптан 9 млн. теңгеге дейін табыс табамын деп отырмын», — дейді Маржан Жүсіпбекова.
Өзіндік бизнес-идеяларын арқалап келгендердің басым бөлігі мал шаруашылығымен байланысты. Бірі жылқы асыраса, енді бірі сиыр, қой бағумен айналысқысы келетіндерін жеткізді. Бағын сынаған жастар арасында болашақта жүк тасымалымен айналысуды көздегендерде кездесті.
Еске сала кетсек, аталған жеңілдетілген несие алуға мемлекеттік бюджеттік ұйымдардан жалақы алатын жастар қатыса алмайды. Шағын несие жұмыссыз жастарды еңбекке тартуға, кәсіпкерлікті қолдауға бағытталған.
