«Іле ауданы Өтеген батыр кентінде орналасқан ЖЭО-3 және Алматыдағы ЖЭО-2 жұмысы модернизацияланады, яғни қайта жаңғыртылады. Себебі, бұл жылу электр орталықтары Алматы қаласының, Алматы агломерациясына жататын аумақтардың ауасы ластануының бірден-бір факторы», — деді министр.
Оның айтуынша, ЖЭО-2 және ЖЭО-3 бойынша техникалық-экономикалық негіздемеге мемлекеттік сараптаманың оң қорытындысы алынды. Ашық тендер өткізіледі. Барлық жұмыстарды 2026 жылы аяқтау жоспарланып отыр.
«Арнайы трубиналар салынып, жұмыс бағыты өзгерсе, ЖЭО-2-нің ауаға бөлетін қалдықтары 38 мың тоннадан 2 мың тоннаға дейін, ЖЭО-3-тегі ауа ластаушы заттары болса 12 мың тоннадан 2,0 мың тоннаға дейін азаяды», — деді Серікқали Брекешев.
Министрдің сөзіне сүйенсек, экология мәселесін талқылау үшін жылу электр орталықтары тиесілі «Алматы электр станциялары» (АлЭС) компаниясының мамандары бірнеше рет халықпен кездескен.
Модернизация бойынша жұмыс жоспары мынадай:
• 2022 ж. желтоқсан — ҚР Энергетика министрлігі қайта аукцион өткізеді;
• 2023 ж. І тоқсаны — Еуропа даму банкімен несиелік шартқа отыру және ЕРС (Engineering, Procurement, Construction — кешенді құрылыста қолданылатын келісім шарт) — шарт жасау.
Айта кетерлігі, ЖЭО-3 жылу қуаты 335 Гкал/сағ, электр қуаты 300 млн кВт/сағ құрайды. Қазіргі таңда электр қуаттылығын жылына 450 МВт-қа жеткізу үшін де жұмыстар жүргізіліп жатыр.
Кешегі күннен бастап ЖЭО-2 конкурсы мемлекеттік сатып алулар ресми сайтында жарияланды.
