2022–2024 жылдар аралығында облыстың негізгі капиталына 2 трлн 369 млрд теңге көлемінде инвестиция тартылды. Оның ішінде:
2022 жылы – 613,9 млрд теңге,
2023 жылы – 737,7 млрд теңге,
2024 жылы – 1 трлн 17,6 млрд теңге.
Үш жыл ішінде өсім 60 пайыздан асты. Бұл өңірдің тұрақты экономикалық дамуын және инвесторлардың жоғары сенімін айғақтайды. Биылғы жоспар – негізгі капиталға тағы 1 трлн 352 млрд теңге тарту.
Осы аралықта тікелей шетелдік инвестиция көлемі 1,8 млрд АҚШ долларынан асты. Ал 2025 жылы бұл көрсеткіш 532 млн долларды құрайды деп күтілуде.
Жаңа жобалар мен ірі кәсіпорындар
Соңғы үш жылда өңірде ТОО «KT&G», «Оспанова Девелопмент», «Корпорация ТехноНИКОЛЬ», «Прима Кус», «Шин-Лайн», «СТК Sokol», «GALANZ Bottlers», «ТК Газоблок» және басқа да ірі компаниялардың жобалары жүзеге асырылды.
Өңірде индустриалды аймақтар желісін дамытуға ерекше назар аударылуда. Қазіргі таңда Алматы облысында жалпы аумағы 1768 гектарды қамтитын 6 индустриалды аймақ бар. Оның ішінде «Береке» және «Қайрат» аймақтарында өндіріс жұмыс істеп тұр. Ал «Шелек» пен «Қазыбек бек» бойынша жобалау-сметалық құжаттамалар аяқталуда. «Тасқарасу» мен «Сұңқар» аймақтарында агроөнеркәсіп саласына басымдық беріліп, 3400-ден астам жаңа жұмыс орны ашылмақ.
Мәселен, «Береке» аймағында Central Asia-дағы ең ірі сублимациялық зауыт іске қосылды. «Fruit Art» компаниясы салған нысанға 42,8 млрд теңге инвестиция құйылып, 247 жұмыс орны құрылды. Кәсіпорын жылына 25 мың тонна жеміс пен жидек өңдеуге қауқарлы.
Құрылыс индустриясы – жаңа деңгейде
Өңір экономикасында құрылыс индустриясының үлесі артып келеді. Қазіргі таңда жалпы құны 235 млрд теңге болатын 14 ірі жоба жүзеге асырылып жатыр. Соның аясында 3100-ден астам жұмыс орны ашылады.
Мәселен, ТОО ПК «Алтын Таға» зауыты темірбетон өнімдерінің кең ауқымын шығаратын болады. Сондай-ақ, ТОО «DONG NENG» тәулігіне 1000 текше метр газоблок өндіруге қауқарлы жаңа кәсіпорын салып жатыр.
Бұл жобалар отандық құрылыс материалдары өндірісін жолға қойып, импортқа тәуелділікті азайтады, бюджет кірісін арттырады әрі жергілікті кәсіпорындардың бәсекеге қабілеттілігін күшейтеді.
Инвестициялық ахуалдың артықшылықтары
Алматы облысының инвестициялық саясаты – өңір экономикасының тұрақты дамуының негізі. Индустриалды аймақтардың дамуы, жаңа өндіріс орындарының ашылуы, шетелдік капиталдың келуі – мұның барлығы тұрғындардың өмір сапасын жақсартуға, жаңа жұмыс орындарын ашуға және инфрақұрылымды нығайтуға ықпал етіп отыр.
