2024 жылы облыстың жалпы өңірлік өнімі 6 триллион теңгеге жетіп, өсім 104,8 пайызды құрады. Бұл – жай ғана статистика емес, өңірдегі жүйелі саясат пен нақты істердің жемісі.
Республика бойынша үздік бес өңірдің қатарына қосылу – кез келген аймақ үшін зор жетістік. Алматы облысы соңғы үш жылда айқын серпіліс жасап, даму көрсеткішімен 2021 жылы республикада 10-орында болса, 2022 жылы 9-орынға көтерілді, ал бүгінде үздік бестікке нық орнықты. Мұндай өрлеу кездейсоқ емес, ол – батыл шешімдер мен тиімді саясаттың нәтижесі.
Бұрын негізінен аграрлық аймақ ретінде танылған облыс бүгінде өндіріс пен инвестиция саласында жаңа белеске шықты. 2022–2024 жылдары өнеркәсіп саласының өсімі 16,9 пайызды құрап, өндіріс көлемі 1 трлн 930 млрд теңгеге жетті. Сарапшылардың болжауынша, 2025 жылы бұл көрсеткіш 2 трлн 210 млрд теңгеге дейін ұлғаюы мүмкін. Бұл – жаңа жұмыс орындарының ашылуы мен халық тұрмысының жақсаруына жол ашатын маңызды қадам.
Облыстық экономика және бюджеттік жоспарлау басқармасының басшысы Асылан Ораз Өңірлік коммуникациялар қызметінде өткен баспасөз жиынында алдағы міндеттерді нақтылады.
– Біздің басты мақсатымыз – тұрақты экономикалық өсімді қамтамасыз ету және халықтың әл-ауқатын арттыру, – деді ол.
Алматы облысының бүгінгі экономикалық жетістігі – жергілікті билік пен халықтың ортақ еңбегінің нәтижесі. Алдағы кезеңдегі басты міндеттер – өндірісті әртараптандыру, инвестициялық тартымдылықты арттыру және әлеуметтік тұрақтылықты қамтамасыз ету.
