Соңғы жылдары облыс тек қазақстандық саяхатшылардың ғана емес, шетелдік туристердің де қызығушылығын тудырып отырғаны осы шаралардың нәтижесін айқын көрсетеді.
Қытаймен ынтымақтастық
Биылғы маңызды оқиғалардың бірі – 17 наурызда өткен Хунань провинциясының роуд-шоуы болды. Қазақстанда алғаш рет ұйымдастырылған бұл шарада Алматы облысы өзінің таулы аймақтарын, көлдерін және тарихи мұраларын таныстырды. Кездесу барысында Алматы – Чаньша бағыты бойынша тікелей әуе рейсін ашу мәселесі талқыланып, SCAT әуе компаниясы қолдау білдірді.
Еуропадағы «қазақ бұрышы»
Сәуір айында Страсбург қаласында Еуропа Кеңесінің ғимаратында Алматы облысына арналған арнайы «қазақ бұрышы» ашылды. Мұнда өңірдің табиғи байлығы мен мәдени дәстүрлері көрсетіліп, Францияның Эльзас аймағының туризм саласымен әріптестік орнатылды.
Халықаралық көрмелер мен спорттық фестивальдер
Алматы облысының туристік әлеуеті KITF 2025 халықаралық туристік көрмесінде де кеңінен таныстырылды. Бұл алаңда әлемнің түкпір-түкпірінен келген мамандармен тікелей байланыс орнатуға мүмкіндік туды.
Мамыр айында өткен Tengri Ultra халықаралық фестивалі өзінің 10 жылдығын атап өтті. Жарысқа 20 елден 1850 спортшы қатысып, Іле аңғары мен Тамғалы-Тас петроглифтері арқылы өткен бағыт ерекше қызығушылық тудырды.
Азия нарығына жол
Маусым айында Шонжы ауылында «Apricot fest» фестивалі өтті. Бұл мереке өңірдің ауыл шаруашылық дәстүрін дәріптеп, гастрономиялық туризмге жаңа серпін берді. Сонымен қатар Алматы облысы Қытайда өткен ITB China 2025 халықаралық көрмесінде «Visit Alatau» брендімен таныстырылып, экологиялық және этнографиялық турларымен назар аудартты.
Жаңа жобалар мен инвестициялар
Өңір әкімдігі туризмді дамытуда ірі жобаларды жүзеге асырып келеді. Қытайлық «Abi Entertainment» компаниясымен Қонаев қаласында бес жұлдызды қонақүй салу жөнінде, ал вьетнамдық «Crystal Bay» компаниясымен «Ақбұлақ village» жобасын дамытуға келісім жасалды. Сондай-ақ Алматы, Ақмола облыстары және Қытайдың Синьцзян-Ұйғыр автономиялық ауданымен туризм саласында ынтымақтастық туралы меморандумдарға қол қойылды.
Алматы тау кластері – басты назарда
Туризмнің негізгі бағыттарының бірі – Алматы тау кластері. 2023–2029 жылдарға арналған тұжырымдамаға сәйкес, Тұргеннен Қаскелеңге дейінгі тау-шаңғы базаларын дамыту жоспарланған. 2024 жылдың қаңтар-қыркүйек айларында Қазақстан курорттарына келген 3,4 миллион туристің 2 миллионы осы тау кластерін таңдаған. Бұл жалпы көрсеткіштің 58 пайызын құрайды.
Алматы облысы туризмді дамытуда экологиялық бағытқа ерекше көңіл бөліп отыр. Табиғи байлықты сақтау мен туристік инфрақұрылымды үйлестіре дамыту – басты басымдық. Сарапшылардың айтуынша, жобаға шамамен 6 млрд теңге инвестиция қажет.
