Журнал әйгілі америкалық Travel + Leisure бренді лицензиясымен жарық көріп, саяхат, мәдениет және өмір салтына арналған жоғары сапалы контент ұсынады.
Іс-шараның негізгі мақсаты — өңіраралық ынтымақтастықты нығайту. Осы ретте Алматы облысы әкімдігінің делегациясы шараға құрметті қонақ ретінде қатысып қана қоймай, өңірдің туристік әлеуетін халықаралық деңгейде танытуға белсенді серіктес ретінде танылды. Бұл қатысу — өңірдің жаһандық туристік нарықтағы орнын айқындайтын нақты қадамдардың бірі.
Алматы облысының халықаралық жобаға қатысуы — өңірдің ашық, серпінді және жаһандық туризм үшін тартымды аймақ ретіндегі мәртебесін нығайтуға бағытталған маңызды бастама. Табиғи байлығы, тарихи-мәдени мұрасы мен алуан түрлі туристік бағыттары арқылы облыс ішкі және сыртқы туризмнің дамуына елеулі үлес қосып келеді.
«Біздің өңір – Қазақстанның көркем әрі қарқынды дамып келе жатқан туристік аймағы. Біз экотуризмді, агротуризмді және заманауи мәдени демалыс форматтарын дамытудамыз. Өңіріміздің табиғи және мәдени байлығын әлем жұртшылығымен бөлісуге ұмтыламыз. Бұл жоба —- жай ғана журнал емес, Орталық Азияның бай мәдениеті мен табиғатын әлемге танытатын маңызды алаң», — деді Алматы облысы әкімінің кеңесшісі Самат Ахилбеков.
Жобаның бас редакторы Барно Икрамова Travel + Leisure Central Asia журналының басты мақсаты — заманауи Орталық Азия келбетін қалыптастырып отырған бағыттар мен тұлғаларды, көрікті орындарды жаһанға таныстыру екенін атап өтті. Ал BHH Enterprises директорлар кеңесінің төрағасы Бекзод Хамзаев бұл бастама туризм мен мәдениетаралық байланысты дамытуда тиімді платформа болатынын жеткізді.
Алай базарында өткен тұсаукесер — Орталық Азия елдерін ортақ тарих пен мәдени мұра арқылы біріктіретін маңызды символға айналды. Іс-шара аясында журналдың алғашқы саны таныстырылып, қатысушы елдер өкілдері өз баяндамаларын ұсынып, өңірдің мәдени мұрасын танытатын арнайы бағдарлама өтті.
Travel + Leisure Central Asia жобасының іске қосылуы — ақпараттық мәнге ие оқиға ғана емес, сонымен қатар Орталық Азияны жаһандық деңгейде жаңа қырынан көрсетуге бағытталған стратегиялық бастама. Бұл үдерісте Алматы облысы — өңірлік туризмнің ірі хабы ретінде жетекші рөл атқарып отыр.
