Мәселен, 2022 жылы 4 158 шара өткізілсе, 2023 жылы олардың саны 4 753-ке жетіп, 14,3 пайыздық өсім тіркелді. Ал 2024 жылы да оң динамика сақталып, 4 825 іс-шара ұйымдастырылды. Бұл 2023 жылмен салыстырғанда тағы да 1,5 пайыздық артық көрсеткіш.
Биылғы жылдың алғашқы сегіз айында облыс көлемінде 2 587 спорттық іс-шара өткізілді. Жалпы 2025 жыл қорытындысымен өңірде 3 Азия чемпионаты, 9 Қазақстан чемпионаты, 6 халықаралық, 23 республикалық, 95 облыстық чемпионат және 80 облыстық турнир өткізілді. Сондай-ақ аудандық және қалалық деңгейдегі 2 371 жарыс ұйымдастырылып, мыңдаған спортшы қамтылды.
Мұнымен қоса, мемлекеттік қызметшілер арасындағы дәстүрлі спартакиадалар, отбасылық спорт жарыстары, жаппай жүгіру марафондары, әртүрлі спорт түрлерінен ашық турнирлер облыс жұртшылығының сүйікті дәстүріне айналды.
2025 жылы өткізілген айтулы спорттық шаралар қатарында «Ұлы дала жорығы – 2025» халықаралық марафон-бәйгесі, Талғар ауданындағы IV Азия чемпионаты (аударыспақтан), Қарасай ауданында балалар мен жасөспірімдерге арналған «BATYR BALA – 2025» халықаралық турнирі, сондай-ақ Қонаев қаласында өткен «OCEANMAN QAZAQSTAN – 2025» халықаралық жүзу жарысы бар. Бұдан бөлек, Еңбекшіқазақ ауданында өткен, Мәскеу олимпиадасының чемпионы Жақсылық Үшкемпіровті еске алуға арналған республикалық турнир де жоғары деңгейде өтті.
Бұл көрсеткіштер Мемлекет басшысының тапсырмаларына сәйкес бұқаралық спортты дамытудың өңірде жаңа серпін алғанын айқын дәлелдейді.
Инфрақұрылымдық даму қарқыны
Алматы облысында спорттық инфрақұрылымды дамыту бұқаралық спорттың өркендеуіндегі негізгі алғышарттардың бірі. 2022–2024 жылдар аралығында халықтың спорт нысандарына қолжетімділік көрсеткіші айтарлықтай өсті.
Халықты 1000 адамға шаққандағы спорт инфрақұрылымымен қамтамасыз ету деңгейі:
2022 жылы – 39,6%;
2023 жылы – 49%;
2024 жылы – 50,14%.
Бұл – небәрі екі жылдың ішінде 10,54 пайыздық тармаққа өскен көрсеткіш.
Облыс бойынша спорттық нысандардың жалпы саны 2022 жылы 2229 болса, 2023 және 2024 жылдары ескі нысандардың есептен шығарылуына байланысты 1891 бірлікті құрады. Дегенмен жаңа спорт нысандарының ашылуы бұл олқылықтың орнын толтырып келеді.
2023 жылы пайдалануға берілген ірі нысандар қатарында Райымбек, Ұйғыр, Жамбыл және Еңбекшіқазақ аудандарындағы спорт кешендері бар. 2024 жылы Еңбекшіқазақ ауданының Ащысай ауылында және Райымбек ауданының Сарыбастау ауылында жаңа кешендер ашылды.
2025 жылы да ірі жобалар қолға алынып отыр. Кеген ауданының Жалағаш ауылында 50 орындық спорт кешенінің құрылысына 1,1 млрд теңге бөлініп, жұмыстар жүріп жатыр. Бұл жоба «Заңсыз иемденілген активтерді мемлекетке қайтару туралы» заң аясында іске асырылуда. Сонымен қатар, Жамбыл ауданының Тарғап ауылында 70 орындық кешеннің құрылысы басталып, оған жергілікті бюджеттен 100 млн теңге бөлінді.
Бұдан бөлек, «Қазақстан Халқына» қоғамдық қорымен бірлескен жобалар аясында Жамбыл ауданының Беріктас ауылында және Кеген ауданының Ақсай ауылында ангар үлгісіндегі спорт залдарын салу жоспарланып отыр.
Облыс әкімдігі, спорт басқармасы және орталық органдардың үйлесімді жұмысының нәтижесінде бұл өңір еліміздегі спорттық дамудың алдыңғы қатарлы аймақтарының біріне айналып отыр.
Алдағы жылдары да Мемлекет басшысының тапсырмаларына сәйкес бұл бағыттағы жұмыстар жүйелі жалғасып, халықтың жаппай спортқа тартылуы мен спортшылардың халықаралық жетістіктері еселей түспек.
