Оның айтуынша, 2023 жылы Қазақстанда адам саудасына қатысты 19 жағдай тіркелген. Оның нешеуі бала болғаны жайлы Қожаев нақты айтпады.
«Істердің басым көпшілігі аяқталды. Шамамен 16-17 адам жаңа туған нәрестелер саудасы үшін жауапқа тартылды. Биыл бізде жаңа туған нәрестелер саудасы бойынша үш факт тіркелді. Бұл фактілердің барлығы ел ішінде орын алды. Ондағы сомалар әр бала үшін 100 мың теңгеден 2 миллион теңгеге дейінгі аралықты қамтиды», — деді министрдің орынбасары мәжілісте.
Қазақстан заңнамасына сәйкес кәмелетке толмағандардың саудасы үшін қылмыстық жауапкершілік қарастырылған. Ең ұзақ мерзім — 18 жыл бас бостандығынан айыру.
Мәжіліс депутаттары бүгін екінші оқылымда адам саудасына қарсы іс-қимыл туралы заң қабылдады. Құжат интернет арқылы жыныстық қызметтерді ұйымдастыру үшін қылмыстық жауапкершілікті, сондай-ақ егер медицина қызметкерлері ата-анасының балаларды перзентханада қалдыру фактілері туралы хабарламаса, олар үшін әкімшілік жауапкершілікті қамтиды. Заңда адам саудасы құрбандарының құқықтары, кәмелетке толмағандардың құқықтарын қорғау және осы саладағы халықаралық ынтымақтастық негіздері жазылған.
Фото: sb.by
