Алайда турнирдің ойын кестесі қазақстандық жанкүйерлерді қуанта қойған жоқ. Себебі матчтардың басым бөлігі түнгі уақытта, таңсәріде немесе жұмыс күні басталар сәтте өтеді.
Футболдан әлем чемпионаты 11 маусымда АҚШ, Канада және Мексикада басталады. Турнирдің ашылу матчында Мексика құрамасы Оңтүстік Африкамен кездеседі. Ойын Мехикодағы әйгілі «Ацтека» стадионында өтеді. Қазақстан уақыты бойынша кездесу 12 маусым күні сағат 00:00-де басталады.
Үш елде қатар өтетін бұл әлем біріншілігі тарихтағы ең ауқымды турнир болмақ. Алғаш рет чемпионатқа 48 құрама қатысып, жалпы саны 104 матч ойнатылады.
Қазақстандық көрермендер үшін басты қиындық – уақыт айырмашылығы. Солтүстік Америкадағы матчтардың көпшілігі Қазақстан уақыты бойынша түнгі және таңғы мезгілдерге сәйкес келеді. Бұл жанкүйерлерге сүйікті құрамаларының ойындарын көру үшін ұйқы тәртібін өзгертуге тура келетінін білдіреді.
Әлем чемпионаты ойындарының трансляциясын Қазақстан аумағында Qazaqstan және Qazsport телеарналары көрсетеді.
