Қазір өрттің жалпы аумағы шамамен – 60 мың га. Алайда елдімекендерге қауіп жоқ. Экология және табиғи ресурстар министрлігі өрттің таралуын шектеу үшін тиісті шаралар жүргізіліп жатқанын мәлімдеді.
«13 маусым күні таңғы сағат 4-тен бастап өрттің шеттерін сөндіру мақсатында төрт әуе бортының ұшуы жүзеге асырылды. Алайда қатты түтін ұшқыштардың жұмысын қиындатуда. Қазіргі уақытта өртті сөндіруге барлығы 1803 адам, 348 бірлік түрлі техника мен 12 тікұшақ жұмылдырылған», – деп жазылған министрлік хабарламасында.
Метеорологтардың хабарлауынша, 13 маусым күні кешке өткінші жаңбыр жауып, найзағай ойнауы мүмкін. Күндіз солтүстік-шығыстан жел соғуы ықтимал.
Айта кетейік, бұған дейін Абай облысының әкімі Нұрлан Ұранхаев жалынның әлі де басыла қоймағанын, десе де орман өртінен жақын аумақтағы ауылдарға қауіп жоқ екенін айтқан болатын.
Еске салайық, 8 маусым күні тұтанған «Семей» орманы резерватындағы өртпен күреске жұмылдырылған 14 орманшы қаза болған еді. Абай облысы әкімінің орынбасары Димитрий Гариковтың айтуынша, өрт 2 рет түскен найзағайдан тұтанған.
Президент Қасым-Жомарт Тоқаев жұмыс сапарымен Абай облысына барды.
12 маусым елімізде Аза тұту күні болып жарияланды.
