Тәртіп сақшылары 2,4 млн теңгеден астам қарызы бар ер адамды «Алматы-Астана» пойызынан түсіріп алған. Ол бизнес серіктесінен 2 жыл бұрын қарыз алып, қысқа уақыт ішінде қайтарып беретіндігі жайлы қолхат жазып берген. Бірақ осы уақытқа дейін ақшаны қайтармаған.
«Өскемен қалалық полиция басқармасына жеке сот орындаушысынан 33 жастағы азаматтан екі миллион теңгеден астам қарызды өндіріп алу туралы қаулы келіп түскен. Іздестіру іс-шаралары барысында көші-қон қызметінің мамандары борышкердің орналасқан жерін анықтады. Ол Алматыдан елордаға бара жатқан пойызда болған», — делінген ақпаратта.
Полицейлер борышкерді Шу қаласындағы станцияда ұстаған. Енді қарызды өндіріп алумен сот орындаушылары айналысатын болады.
Жыл басынан бері полиция департаменті 70-тен астам борышкерді анықтады.
