Ақорда мәліметінше, заң Мемлекет басшысының психологтердің қызметін жүйелеу және өзін «психолог» немесе «коуч» ретінде таныстыратын біліктілігі расталмаған мамандардың қызметіне бақылауды күшейту жөніндегі тапсырмасын орындау мақсатында әзірленген.
Бұған дейін құжатты Парламент Сенаты мақұлдаған болатын. Депутат Әсем Рахметованың айтуынша, заң азаматтарға көрсетілетін психологиялық көмектің сапасын арттырып, кәсіби қызметтің бірыңғай стандарттарын қалыптастыруға бағытталған.
Жаңа заңға сәйкес, психологтердің кәсіби даярлығына қойылатын талаптар күшейтіледі. Енді мамандардың біліктілік деңгейі, кәсіби құзыреттері мен даярлық сапасын айқындайтын арнайы кәсіби стандарт бекітіледі.
Сонымен қатар психологтердің қызметінде сақталуы тиіс кәсіби этика қағидалары заң жүзінде реттеліп, Кәсіби этика кодексі қабылданады. Бұл құжат мамандардың жауапкершілігін арттырып, клиенттердің құпия ақпаратын қорғау талаптарын нақтылайды.
Ғылыми әдістер міндетті болады
Заңдағы маңызды жаңашылдықтардың бірі – психологтердің жұмысында тек ғылыми негізделген әдістерді қолдану талабының енгізілуі.
Сондай-ақ мамандардың кәсіби деңгейін тұрақты жетілдіруге бағытталған супервизия институты енгізіледі. Бұл тәжірибелі мамандардың жас психологтерге әдістемелік қолдау көрсетуіне мүмкіндік береді.
Сертификаттау және мемлекеттік тізілім енгізіледі
Құжатқа сәйкес, елімізде психологтерді міндетті сертификаттау жүйесі іске қосылады. Бұл олардың кәсіби талаптарға сәйкестігін бағалауға мүмкіндік береді.
Бұдан бөлек, Қазақстанда алғаш рет психологтердің мемлекеттік тізілімі құрылып, онда кәсіби қызметпен айналысуға құқығы бар мамандар туралы мәліметтер жинақталады.
Елде 43 жоғары оқу орны психолог даярлайды
Қазіргі таңда Қазақстанда психолог мамандарын даярлайтын білім беру жүйесі қалыптасқан. Республика бойынша 43 жоғары оқу орнында психология мамандығы бойынша кадрлар дайындалады. Бүгінде бұл бағытта 17 мыңға жуық студент білім алып жатыр, ал жыл сайын шамамен 4 мың түлек оқуын аяқтайды.
Мемлекет басшысының тапсырмасына сәйкес, бүгінде еліміздің барлық өңірінде психологиялық қолдау орталықтары жұмыс істейді. Ресми мәліметке сәйкес, өткен жылдың өзінде бұл орталықтардың мамандары 50 мыңға жуық азаматқа психологиялық кеңес берген.
Жаңа заңның қабылдануы психологиялық қызмет көрсету сапасын арттыруға, азаматтардың құқықтарын қорғауға және кәсіби стандарттарға сай келмейтін мамандардың қызметін шектеуге бағытталған маңызды қадам ретінде бағалануда.
