Шара Республика күніне орай ұйымдастырылған.
«Ауылда спортқа қызығушы балалардың көп болғаны қуантады. Бұл нысанның салауатты өмір салтын қалыптастырып, халық арасында дәріптеуде маңызы зор. Жалпы Нарынқол өңірінің жастары белсенді әрі талантты. Осы спорт кешенінен Қазақстанның туын көкке көтеретін, айбынды жастар тәрбиеленіп шығады деп үміттенеміз. Ауыл, аудан, қалаларымыз дами берсін! Мереке құтты болсын!» — деді Марат Сұлтанғазиев құттықтау сөзінде.
Содан кейін өңір басшысы нысанның қызыл лентасын қиып, кешенді аралап шықты. Ғимарат 1 гектардан астам аумақты алып жатыр. Аулада баскетбол және футбол алаңдары, көліктерге арналған тұрақ, воркаут алаңы бар. Ал кешеннің ішінде 70 көрерменге арналған спорт, бокс, фитнес, күрес, гимнастика залдары орналасқан.
Сонымен қатар ғимаратта медициналық пункті, ішкі дәретханалар, гардероб та қарастырылған. Мұнда бір уақытта 100-ден астам адам спортпен шұғылдана алады. Спорт кешенін жылыту үшін блоктық-модульдік қазандық орнатылған. Құрылысқа 1 млрд теңгеге жуық ақша жұмсалған.
