Оның айтуынша, Алматы облысының қоғамдық көлік желісі 94 автобус маршрутынан тұрады (3 облысаралық бағыт, 28 ауданаралық бағыт, 37 ауданішілік бағыт, 26 қала маңындағы бағыт). Биыл 29 әлеуметтік маңызы бар маршрутты субсидиялау үшін 1 млрд. 345 млн. теңге қаржы бөлінді.
«Алматы агломерациясының елді мекендерін автобус қатынасымен толық қамту мақсатында автобус паркі құрылды. Келесі жылы ауданішілік маршрутты, сондай-ақ жолаушыларды ауылдардан ірі елді мекендерге тасымалдауды көздейтін «Нарынқол-Шелек» бағытында шағын автобус қатынастарын ұйымдастыруды қарастыруды тапсырамын», — деді Марат Сұлтанғазиев.
Сонымен қатар әкім жақсы және қанағаттанарлық деңгейдегі жолдар туралы атап өтті.
«Биыл облыс көлемінде жол салуға және жөндеуге 50,4 млрд. теңге бөлінді. Райымбек ауданындағы жалпы пайдаланымдағы автомобиль жолдарының ұзындығы 587 шақырым құрайды. Жақсы және қанағаттанарлық жағдайдағы облыстық маңызы бар автожолдардың үлесі – 90%, ішкі көшелердің үлесі – 54%», — деді облыс әкімі.
Марат Сұлтанғазиевтің сөзіне сүйенсек, Республикалық «Кеген – Нарынқол» автожолының 15 шақырымын жөндеу жұмыстары келесі жылы аяқталады. Қалған 51 шақырымын жөндеуді «ҚазАвтоЖол» филиалы 2024 жылы бастауы қажет. Ал облыстық маңызы бар Сарыжаз – Қарасаз – Текес жолының 34,4 шақырымына жөндеу жасалып, пайдаланымға берілді. «Нарынқол-Сүмбе» жолының 35 шақырымына конкурстық рәсімдерден соң мердігер анықталып, жөндеу жұмыстары басталады.
