Ұлттық банк дерегінше, тұжырымдама инвестициялық саясатты, Ұлттық қордағы активтерді басқарудың негізгі қағидалары мен тәсілдерін айқындайды.
«Тұжырымдамада активтерді стратегиялық аллокациялауды жүзеге асыру үшін қажетті Ұлттық қор қаражатын ұзақмерзімді инвестициялау қағидаты белгіленген. Бұл тәуекелді және қорғаныс активтер класын құрамдастырып қолдануға мүмкіндік береді. Ұлттық қордағы жинақ портфелінің үлесі келесідей бөлінеді: 60% — облигациялар, 30% — акциялар, 5% дейін балама құралдар және 5% дейін — алтын. Жаңаша бөлу облигациялар портфелін дамыған елдердің мемлекеттік облигацияларына, корпоративтік облигацияларға және дамушы елдердің мемлекеттік облигацияларына да әртараптандыруды көздейді», — деп жазылған құжатта.
Сонымен қатар бекітілуі мүмкін тұжырымдама инвестициялық процестің негізі болмақ. Бұған қоса, ол Ұлттық қордағы активтерді басқару тиімділігінің көрсеткіштерін анықтайды.
«Тұжырымдаманың мақсаты – Қазақстан Ұлттық банкінің ұзақмерзімді институционалдық инвестор ретіндегі мәртебесін растау үшін қажетті іргетасты нығайту және негіздерді бекіту. Тұжырымдаманы іске асыру, яғни, онда белгіленген шектеулерді, қағидаттар мен тәсілдерді сақтау 2030 жылға қарай 100 млрд доллар жинақтауға және «Ұлттық қор – балаларға» бағдарламасының табысты жұмыс істеуіне ықпал етеді», — деп түсіндірме берілген тұжырымдамаға.
Құжат негізінде инвестициялық портфельді әртараптандыру, қорғаныс стратегиясы мен ESG қолданудың басымдықтарын айқындау міндеті қойылған. Тиісінше, аталған бағыттар бойынша қолға алынатын істер Ұлттық қордың кірістілігін арттырады.
