«Ойынханада жұмыс істеп жүргенде небір тәуелді адамдарды көрдім. Оларды біз сыпайы түрде «қонақтар» деп айтамыз. Сондай қонақтың біреуінің айтуынша, «Лото клубта» да казинодағы ойынды ойнап (америкалық, еуропалық рулетка), жақсы ұтысқа кенелуге болады екен. Арада біраз уақыт өткен соң әріптестердің сол ойынды онлайн ойнап жүргенінен хабардар болдым», – деді Алтын Рысқұлқызы (сұхбат берушінің талабы бойынша есімі өзгертілген).
Алтынның айтуына қарағанда, «Bingo club 37» және «Bingo club 38» ойындары дәл ойынханадағыдай. Екі ғана айырмашылығы бар: бірі – рулетка орнына барабан айналуы, екіншісі – 0 (зеро), 00 (дабл зеро) емес, 37 және 38 санының қолданылуы.
«Ақшаны тігетін орындар, ұтыс көлемі, бәске қойылатын ақша көлемі, рулетка аумақтары (зоналары) – бәрінің де кәнігі ойынханадан еш ерекшелігі жоқ», – деді казиноның бұрынғы қызметкері.
Қонаев қаласының тұрғыны Алтынның айтуынша, слот залдан жұмыстан шығып, «Лото клуб» ойынына тәуелді болып қалған адамдар да жоқ емес.
«Слот залда электронды рулетканың ойынын тамашалап, қалайда жеңуге болады деп, бойына сенім ұялатқан жігіттер көзі байланып, қарыздан қарызға кіріп кетті. Отбасының шырқы бұзылғандар да бар. Жалпы елімізде осы ойындардың жүргізілу тәртібіне, «Лото клуб» ойын бизнесін толық зерттеу керек секілді», — деді Алтын Рысқұлқызы.
ҚР Қаржы мониторингі агенттігінің облыстағы экономикалық тергеп-тексеру департаментінің (ЭТТД) маманымен тілдескен қызметкер жазбаша шағым қалдырды.
«Бұл мәселе республика көлемінде талдап-тексерілуі қажет. Қандай да бір заңбұзушылықтар орын алса, бұған қатысы бар жеке және заңды тұлғалар заң алдында жауап береді», — деді ЭТТД маманы.
Естеріңізде болса, ҰҚК-нің 2019 жылдан бастап «Olimp» БК-не жүргізген талдау нәтижесінде аталған мекеменің жасырын интернет казиносы болғаны анықталды. 2021 жылдың маусымында заңсыз әрекетке қатысы бар тұлғалар 5 жылдан 8.5 жылға дейін бас бостандықтарынан айырылды. Биыл шілдеде 5,5 миллион АҚШ доллары және 200 мың еуро Ұлттық банкке қайтарылды. Және құны 3.6 млрд теңге болатын 4 ұшақ, 5 жер учаскесі, 15 автокөлік, 30 жылжымайтын мүлік тәркіленді.
