Фармацевтика саласындағы түсірілім “Abdi Ibrahim Global Farm” ЖШС кәсіпорнында өтті. Компания – Түркиядағы әйгілі Abdi İbrahim Pharmaceuticals халықаралық холдингінің Қазақстандағы еншілес ұйымы.
Кәсіпорын GMP халықаралық стандарттарына толық сай, заманауи жабдықтармен қамтамасыз етілген. Мұнда антибиотиктер, жүрек-қан тамырлары ауруларына қарсы дәрілер, дәрумендер және басқа да әлеуметтік маңызы бар препараттар өндіріледі.
Зауыттың басты мақсаты – қазақстандықтарды сапалы әрі қолжетімді дәрі-дәрмекпен қамтамасыз ету, импорттық тәуелділікті азайту.
Өндірістік бақылау жөніндегі бас маман Бақдәлет Алтынбекұлы өз ойымен бөлісті:
«Бұл жерде әрбір қадам – жауапкершілік. Біз жасаған дәрілерді мыңдаған адам ішеді. Сол себепті біз үшін ең бастысы – сапа мен тәртіп. Өзімнің еңбегім адамдардың денсаулығына пайдасын тигізіп жатқанына қуанамын», – дейді ол.
Мұндай жобалар жастарға өндіріс саласын таныстырумен қатар, олардың болашақ мамандық таңдауына да ықпал етеді. Жобаны ұйымдастырушылардың пікірінше, еңбек адамының бейнесін дәріптеу арқылы жастардың нақты салаларға деген қызығушылығы артады.
«Әрбір мамандықтың қадірі бар. Бүгінгі таңда бізге тек офистік қызмет қана емес, нағыз өндіріс мамандары ауадай қажет. Жастар осыны түсінуі үшін осындай жобалар қажет», – дейді «Атамекен» кәсіпкерлер палатасының өкілдері.
«Жұмысшының бір күні» – еңбек адамына құрмет көрсетуге, өндірістің қыр-сырын халыққа жеткізуге арналған тың бастама. Abdi Ibrahim Global Farm зауытындағы түсірілім – соның бір айқын дәлелі.
Бұл жоба еліміздегі мыңдаған жұмысшының бейнесін ашып, жастарға үлгі боларына сенім мол.
Алматы облысы кәсіпкерлер палатасының баспасөз хатшысы
Бисембекова Раушан
