Тұрмыстық зорлық-зомбылық – бүгінгі қоғамдағы ең өзекті әлеуметтік мәселелердің бірі. Ол тек бір отбасының ғана емес, тұтас қоғамның қауіпсіздігі мен тұрақтылығына әсер ететін күрделі құбылыс. Зорлық-зомбылық физикалық күш қолданумен ғана шектелмейді. Психологиялық қысым көрсету, қорқыту, балағаттау, экономикалық тәуелділікке мәжбүрлеу және жыныстық сипаттағы зорлық әрекеттері де тұрмыстық зорлық-зомбылықтың түрлеріне жатады. Мұндай әрекеттер адамның ар-намысына, денсаулығына және өмір сүру сапасына үлкен зиян келтіреді.
Отбасында орын алған кез келген зорлық ең алдымен балалардың психикасына кері әсер етеді. Мұндай ортада өскен бала өзіне деген сенімін жоғалтып, қорқынышпен өмір сүреді немесе болашақта зорлық-зомбылықты қалыпты жағдай ретінде қабылдауы мүмкін. Сонымен қатар, балалардың білім алуға деген ынтасы төмендеп, олардың тұлғалық дамуына кері ықпал етеді. Сондықтан бұл мәселенің салдары бір отбасының шеңберімен ғана шектелмейді, ол қоғамның болашағына да қауіп төндіреді.
Өкінішке қарай, көптеген жәбірленушілер қорқыныштан, ұят сезімінен немесе қоғамның пікірінен именіп, көмек сұрауға батылы жетпейді. Ал үнсіздік мәселені одан әрі ушықтыра түседі. Зорлық-зомбылыққа ешқашан көз жұмуға болмайды. Әрбір азамат мұндай жағдайға бейжай қарамай, заң аясында әрекет етуі қажет. Қиын жағдайға тап болған адамдарға уақытылы қолдау көрсету, қажетті ақпаратпен қамтамасыз ету және олардың құқықтарын қорғау – баршамыздың ортақ жауапкершілігіміз.
Мемлекет тарапынан тұрмыстық зорлық-зомбылықтың алдын алу және жәбірленушілерді қорғау бағытында түрлі заңнамалық және әлеуметтік шаралар жүзеге асырылып келеді. Арнайы дағдарыс орталықтары мен сенім телефондары жұмыс істейді, құқық қорғау органдары тарапынан қорғаныс шаралары қолданылады. Алайда бұл мәселені тек мемлекеттік мекемелер ғана емес, бүкіл қоғам болып шешуге атсалысуы қажет.
Тұрмыстық зорлық-зомбылықтың алдын алу үшін құқықтық сауаттылықты арттыру, отбасы құндылықтарын нығайту, жастарға өзара сыйластық пен жауапкершілікті дәріптеу маңызды. Мектептерде, колледждерде және жоғары оқу орындарында түсіндіру жұмыстарын күшейту, отбасы тәрбиесіне ерекше көңіл бөлу – мұндай келеңсіздіктердің алдын алудың тиімді жолдарының бірі.
Бақытты отбасы – берік мемлекеттің негізі. Әрбір адамның қауіпсіз әрі тыныш өмір сүруге құқығы бар. Отбасында сыйластық, түсіністік пен мейірім үстемдік құрған кезде ғана қоғам дамып, мемлекет нығая түседі. Сондықтан тұрмыстық зорлық-зомбылыққа қарсы күресу – құқық қорғау органдарының ғана емес, әрбір азаматтың ортақ міндеті. Зорлық-зомбылыққа жол бермей, бір-бірімізге жанашырлық танытып, әділетті қоғам қалыптастыру – бәріміздің қолымызда.
