Кеген ауданындағы көркі көз тарталық Саты ауылын бұдан артық суреттеу мүмкін емес сияқты. Бұл жер Қазақстандықтар үшін ғана емес шет елдерден келетін туристер арасында да танымал. Бір барған адамды қайта өзіне тартып тұратын мекенде жақында тағы бір тағылымға толы тарихи аймақ табылды.
Тек ол жерді дамыту үшін мықты инвестор керек дейді өңір басшысы.
«Біздің мақсат Алматы облысының туризмін дамыту мақсатында осы жаңа локацияны ашу. Саты ауылының кіре берісінде, жергілікті азаматтардың өз күшімен салған стелла бар. Міне осы жерде, мына ағып жатқан өзеннің түбінде бұрынғы заманнан қалған таңбалы тастар бар. Бұл тарихын тереңнен танығысы келетін қазақстандықтар үшін де, шетелдіктер үшін де қызығарлық аймақ. Сондықтан, мұны болашақта ашу керекпіз. Аталған бастаманы облыстық туризм басқармасы да қолдап отыр. Енді дамытуға атсалысатын мықты инвестор болса деген ниетіміз бар», — дейді Кеген ауданының әкімі Нұрбақыт Теңізбаев.
Қазіргі уақытта, осы бағытта келіссөздер жүргізіліп жатыр екен. Тастағы таңбалардың қай ғасырда салынғанын зерттеу жолға қойылды.
«Алдағы уақытта, Кеген ауданы Саты ауылының маңында жаңа туристік бағыттарды ашуды жоспарлап отырмыз. Себебі, облыстағы ежелден қалған таңбалы тастардың тарихын туристерге де танытуымыз керек, оның үстіне қазір Көлсай көлдері ұлттық саябағына келушілер тым көп болғандықтан, туристердің ат басын басқа да бағыттарға бұру. Жалпы Алматы облысында турист санының өсуіне байланысты, жаңа туристтік орындар ашуға қажеттілік бар», — деп атап өтті Инфрақұрылымды дамыту және туристік жобаларды іске асыру бөлімінің басшысы Шерхан Есентемиров.
Айта кетейік, бұл Алматы облысында табылған үшінші — Таңбалы тас. Одан бөлек, Қонаев қаласы маңында және Жамбыл ауданында да дәл осындай тарихи мекендер бар.
Сонымен қатар, облыстық туризм басқармасы өкілдері Асы үстіртінде кемпингтерге арналған абаттандыру жұмыстары жүргізіліп, жұмсақ инфрақұрылыммен жабдықталатынын айтты. Ал Қайыңды мен Көлсай көлдеріне бару үшін туристік соқпақты ыңғайландыру жолға қойылды.
Ендеше, туған жердің табиғатын танытып, туризмді дамытудағы бастамалар жалғаса берсін!
