Таңертең ғана сайлау учаскесінде қалаған кандидатқа дауыс беріп үлгерген келіншектер аздаған сәттерден соң-ақ сәбилі болды. Нақтырақ айтқанда, бүгін Қонаевта Баймұхаммед, София, Әмина есімді үш балапан өмір есігін ашты.
«Ерекше күні өмір есігін ашқан балапаным халықтың қалаулысы болсын деп тілеймін. Қуанышым шексіз. Ақ халатты абзал жандарға, перзентхана ұжымына айтар алғысым көп. Бүгін, елімізде өтіп жатқан сайлау ойдағыдай өтіп, Қонаев қаласының болашағы жарқын болсын», — деді Әмина есімді сәбидің анасы Жансая Дүйсенбек.
Дәрігерлердің айтуынша, сәбилердің денсаулығында еш кінәрат жоқ.
