Токио демографиялық дағдарыспен күресу үшін жаңа тәсілдерді сынақтан өткізуде. Қазіргі таңда Жапонияда халықтың қартаю қарқыны жоғарылап, ал жастар бала тууға асықпайды. Бұл көбінесе олардың жұмысбастылығы мен өмір салтына байланысты. Осыны ескере отырып, ел үкіметі 4 күндік жұмыс аптасын енгізуді жоспарлап отыр, деп хабарлайды alataunews.kz.
Шетелдік басылымдардың мәліметінше, бұл бастама қызметкерлерге аптасына төрт күн ғана жұмыс істеу мүмкіндігін береді. Жобаның негізгі мақсаты — әйелдерге түсетін жүктемені азайтып, елдегі туу көрсеткішін арттыру. Жапониядағы халық қартаю мәселесі күн тәртібіндегі басты проблемалардың бірі болып отыр.
Жаңа жүйе аясында жұмысшылар тек қысқартылған жұмыс аптасымен шектелмей, сонымен қатар бала күтіміне арналған жартылай демалыс алу құқығына ие болады. Бұл жұмыс уақытын күніне екі сағатқа қысқартуды да қамтиды.
«Әйелдердің бала туу және тәрбиелеу үшін мансабын құрбан етпеуі маңызды. Сондықтан біз жұмыс форматын икемді етуді қарастырып жатырмыз,» – деді Токио губернаторы Юрико Коикэ қалалық ассамблея отырысында.
