«Жылдың алдын ала қорытындысы бойынша жергілікті жолдардың сапасы жағынан Маңғыстау (95%), Жамбыл (95%), Алматы (91%) облыстары көш бастап тұр. Ал БҚО (39%), Ақтөбе (66%) және Атырау (70%) облыстарында жол жағдайы мәз емес», — деп хабарлады ведомстводан.
Биыл еліміздегі 4,6 мың шақырымдай жергілікті автожол жөндеудің барлық түрімен қамтылып, оның 2,6 мың шақырымында тиісті жұмыстар аяқталды. Оған 372 млрд теңге бөлінген.
Жергілікті желіні дамыту шеңберінде елімізде 486 жоба, атап айтқанда күрделі және орташа жөндеу бойынша – 391, құрылыс және реконструкциялау бойынша — 95 жоба іске асырылып жатыр. Жыл соңына дейін 164 жөндеу жобасын, 6 автомобиль жолдарын салу және реконструкциялау жобасын аяқтау жоспарланды.
Бұдан бөлек биыл Алматыдағы Абай даңғылының жалғасын абаттандыру бойынша да жұмыстар аяқталуы тиіс. Айта кетейік, даңғыл жол Мемлекет басшысының тапсырмасына сәйкес іске асырылып жатқан Үлкен Алматы айналма автомобиль жолының 6 радиалды тармағының бірі саналады. Жүргізілген жұмыстардың қорытындысы бойынша еліміздегі жергілікті жолдар желісінің нормативтік жағдайы жыл соңына дейін 85%-ға жеткізіледі деп көзделіп отыр.
