«Анаға құрмет» мұражайы Қазақстан бойынша әлеуметтік желіде «Ақ кимешек – айбыным» байқауын жариялаған болатын. Мақсаты – ұмыт болуға айналған дәстүрімізді қайта жаңғырту, насихаттау. «Ақ кимешек – айбыным» байқауының талабы бойынша әйелдер кимешекпен түскен суретін жіберу керек. Байқауға Қазақстан бойынша 250 адам қатысқан.
«Қазіргі таңда кимешек кию қалып барады. Әжелер өте сирек киеді. Әжелер заманауи көрініп, өздерін жас көрсетуге құмар. Біз, мұражай мамандары кимешектерді мұражайға ғана қойып қоймай, соны насихаттаудың көптеген жолдарын қолға алып келеміз», — дейді «Анаға құрмет» мұражайының басшысы Аршагүл Серікқызы.
Байқау нәтижесі бойынша көне кимешекті көзіндей көріп, ғасырлар бойы сақтап келген 7 әже анықталды. Бұл кимешектер 100 жыл бұрын тігілген. Жібек жіппен, асыл тастармен безендірілген. Матаны пішуі мен қонымдылығы да ерекше.
Айта кетейік, айтулы шараға қырғыз жерінен ұлттық дәстүрді әлі күнге дәріптеп келген әжелер де ат артып келді.
«Бұл байқауға арнайы келдік. Қазақ-қырғыз кимешектерін салыстырып, ұқсастығын көрдік. Біз 6 кимешек алып келдік. Шара сондай жақсы өтіп жатыр. Қазақ аналарына алғыс айтамыз», — деді Қырғыз Республикасының салттық білімдер шебері Әсел Қалқанова.
Шара соңында жеңімпаз иелеріне бағалы сыйлықтар табысталды.
