Кездесуге Қонаев қаласының әкімі Асхат Бердіханов төрағалық етті.
Іс-шара барысында Киберқылмысқа қарсы іс-қимыл басқармасының аға жедел уәкілі Әлібек Керім Алматы облысында 2025 жылы атқарылған жұмыстар мен интернет-алаяқтықтың алдын алу тетіктері, сондай-ақ қылмыскерлер қолданатын жаңа схемалар туралы баяндады.
Оның айтуынша, өңірде 2024 жылы алаяқтықтың 1470 дерегі тіркелсе, 2025 жылы бұл көрсеткіш 1711-ге жеткен. Осылайша, жалпы алаяқтық қылмыстарының саны 16,4 пайызға артқан.
Сонымен қатар облыста интернет-алаяқтық қылмыстарының саны төмендегені атап өтілді. Мәселен, 2024 жылы 75 интернет-алаяқтық дерегі тіркелсе, 2025 жылы бұл көрсеткіш 35-ке дейін қысқарған. Бұл қабылданып жатқан алдын алу шараларының тиімділігін көрсетеді.
Полиция өкілінің мәліметінше, алаяқтар жиі қолданатын тәсілдердің қатарында SMS-код сұрату, жалған инвестициялық жобалар арқылы табыс уәде ету, іс жүзінде жұмыс істемейтін интернет-дүкендер, сондай-ақ делдалдық сипаттағы «дроперлік» схемалар бар.
Ал Мемлекеттік қызмет істері департаментінің басшысы Нұрсұлтан Сейдалиев сыбайлас жемқорлықтың алдын алу бағытында атқарылып жатқан жұмыстарға тоқталды. Оның айтуынша, қазіргі таңда мемлекеттік қызметке қабылдау үдерісі толықтай цифрландырылып жатыр.
Қонаев қаласының әкімі Асхат Бердіхановтың айтуынша, алдын алу жұмыстары жүйелі түрде жүргізілуде.
«Былтыр “Заң мен тәртіп” қағидаты аясында жоғары сынып оқушылары арасында сурет салу, эссе жазу және дебат бағыттары бойынша байқаулар ұйымдастырылды. Сонымен қатар түсіндіру жұмыстары шеңберінде бейнероликтер әлеуметтік желілерде таратылды. Қала тұрғындарымен, мекеме қызметкерлерімен және жастармен барлығы 15 кездесу өткізілді», – деді қала әкімі.
Халық қауіпсіздігін қамтамасыз ету мақсатында бұл бағыттағы жұмыстар алдағы уақытта да жалғасын табады.
