Бұл су құбыры Ақсай су көзі мен «Ақжар» шағын ауданының 35 мың тұрғынын ауыз сумен қамтамасыз етуге септігін тигізеді.
«Ақжар» ықшамауданының 35 мың тұрғынын ауыз сумен қамтамасыз ету мақсатында Ақсай бас су көзінің құрылысы аяқталмай тұрып, осы жылдың наурыз айында Алатау даңғылының бойында магистральдық су құбыры мен каскадты сорғы құрылысын бастадық. Бұл жобаны маусым айының соңына дейін аяқтауды жоспарлап отырмыз», — деді Ерболат Асқарбекұлы.
Сонымен қатар, әкім Наурызбай ауданындағы басқа да шағын аудандардағы су құбыры және кәріз желілерін жобалау бойынша жүргізіліп жатқан жұмыстар туралы хабарлады. Билік 2025 жылға дейін Ақжар, Қарағайлы, Тастыбұлақ және Таусамалы шағын аудандарында 335 шақырым су құбыры және су бұру желісін салуды жоспарлап отыр. Бұл шағын аудандардың барлығы бұрынғы Алматы облысы Қарасай ауданына қарасты ауылдар.
«Біз әкімдіктерге немесе сервистік компанияларға сенбейміз себебі, қайтадан сусыз қаламыз, жыл сайын осындай көрініске үйреніп қалдық. Биыл бірдеңе түзелуі екіталай», – дейді Жаңатұрмыс ауылының тұрғыны Айгүл.
