Алматы облысында 127 мыңнан астам адам тұмаумен ауырған, деп хабарлайды alataunews.kz 24.kz дерегіне сілтеме жасап.
Науқастардың 65 пайызын 14 жасқа дейінгі балалар құрайды. Дегенмен, өткен жылдың осы кезеңімен салыстырғанда сырқаттану деңгейі 23,9 пайызға төмендегені байқалады. Эпидемиологиялық тексеру барысында аденовирус, парагрипп сияқты респираторлық вирустар анықталған.
Мамандардың айтуынша, зертханалық зерттеулер нәтижесінде алдағы уақытта A типті тұмау вирусының басымдық танытуы мүмкін.
Тұмау облыс орталығы – Қонаев қаласында да өршіп тұр. Қалалық ауруханаға күн сайын 100-ден астам адам жүгінеді.
“Көбінесе жөтел, тұмау белгілерімен, мұрынның бітелуі, тамақтың қышуы және құрғақ жөтелмен келеді. Алдын алу үшін қолды антисептикпен жуып, жеке тазалықты сақтау, жылы су ішу және адамдар көп жиналатын жерлерден аулақ болу қажет. Ауырып жүргендер міндетті түрде маска тағуы керек. Сонымен қатар, профилактика ретінде “Оксолин” жақпа майын қолдану және витаминдер қабылдаған жөн”, — дейді дәрігер-инфекционист Асылбек Берікбаев.
