Атшабарда өткен 21 шақырымдық аламанға 33 сәйгүлік, 9 шақырымдық бәйгеге 11 құнан қатысты.
«Алматы облысының әкімі Марат Сұлтанғазиевтің қолдауымен осы жарысты ұйымдастырдық. Жалпы жүлде қоры 10 млн теңгеден астам. Бұл бәйге дәстүрлі түрде өтіп жатқанын айта кеткен жөн. Жарыс көрерменнің көңілінен шықты деген ойдамыз», — деді облыстық спорт басқармасының басшысы Нұрбақыт Теңізбаев.
Жарыс нәтижесінде Жамбыл ауданындағы Аққайнар ауылының «Қарақыз» атты сәйгүлігі құнан бәйгеде басқалардан оқ бойы озып келіп, шабандоз 1 млн теңгені қанжығасына байлады.
Ал 21 шақырымдық аламанда «Сұңқар» сәйгүлігі 1-ші келіп, 5 млн теңгені ұтып алды.
«Жеңіс баламның туған күніне сәйгүлігі жақсы сыйлық жасады. Сонымен қатар отбасымыздың арасында Ұлы Жеңіс күні мерекесінің тойлануына септігін тигізді. Елімізде атбегілер көбейіп, ұтысқа жақсы бәйгелер түсе берсін», — деді сәйгүліктің иесі Аманжол Құдияров.
Посмотреть эту публикацию в Instagram
