Білім беру ұйымы орналасқан ғимарат бұрын жекенің меншігінде болған. Биыл аудандық әкімдіктің ықпалымен, нысан мемлекет иелегіне қайтарылды. Енді ауылдағы балалар түрлі үйірмелерге қатыспақ.
Айша Өксікбай Құрманғазы атындағы қазақ ұлттық консерваториясын тәмамдаған соң ұстаздық жолға түсті. Шалқар ауылында өнер мектебі ашылғанына қатты қуанды. Өзі аптасына екі рет 15 шақырым жердегі Абай ауылынан келіп балаларға фортепиано үйретеді.
«Ауылда өнерлі оқушы көп. Солардың талабын шыңдап, талантын ашуға білікті ұстаздар келіп жатқанына ризамыз», — дейді Шалқар ауылының тұрғыны Гүлнәр Құбашева.
Мектеп 350 оқушыға арналған. Мұндағы жас өнерпаздар 17 бағытта қабілетін шыңдай алады. Атап айтқанда, фортепиано, домбыра, шаңқобыз, қолөнер, гитара, актерлік шеберлік сияқты өнердің түр-түрін үйренулеріне мүмкіндіктері бар. Мекемеде 65 мұғалім жұмыс істейтін болады.
«Жалпы қабылдау емтиханына 298 бала келіп қатысты. Оның ішінде 185 бала оң нәтиже көрсетті. Сонымен қатар Қаскелеңде бұрыннан жұмыс істеп келе жатқан ақылы мектептен 120 бала бізге ауысып келді. Жалпы бүгінгі таңда 305 бала қабылданды», — дейді өнер мектебінің директоры Медет Уәлиханұлы.
Тағы бір айта кетерлігі, шағын өнер ордасында басқа елдімекеннің балаларына да білім алуға болады. Жақында ашылған №5 бағытта жүретін автобуспен Жандосов, Шамалған, Бекболат, Қайнар ауылдарының оқушылары күнде келіп, өнерге үйренеді.
