Жарыста 18 жастан асқан, салмағы 90 келіден жоғары 27 балуан бақ сынасып жатыр. Олар 9 аудан мен Қонаев қаласында іріктеуден өткен, яғни аудандық сайыста үздік үштікке енген спортшылар.
Қатысушылар арасында Мәди Еділбаев, Айбол Айтбай, Нұрғали Жолтаев, Саят Жөкен, Бауыржан Рақышев және Өріс Адибан сынды белгілі балуандар да бар.
Жарыс жеңімпазы алтын белбеумен марапатталады. Сонымен қатар ақшалай сыйақы да қарастырылған: бірінші орын – 5 000 000 теңге, екінші орын – 1 000 000 теңге, үшінші орын – 500 000 теңге.
Турнирдің ашылу салтанатына қатысқан облыс әкімі балуандарға сәттілік тіледі.
«Төл өнеріміз қазақ күресі — халқымыздың батырлық мінезін қалыптастыруда үлкен рөл атқарады. Сондықтан да, осындай ірі жарыстарымызды жиі ұйымдастырып өткізуіміз қажет. Алматы облысы білекті де, жүректі балуандарға кенде емес. Тұңғыш Қазақстан Барысы Ұлан Рысқұл да біздің өңірдің тумасы екені баршамызға мәлім. Қатысушыларға сәттілік тілей отыра, Республикалық деңгейде Алматы облысының мерейін асқақтатын, нағыз шебер жеңіске жетсін деймін», — деді Марат Сұлтанғазиев.
