Бұл жолы Қонаев қаласы маңындағы тозығы жеткен кәріз-тазарту жүйесін жаңарту мәселесі талқыланды.
Басқосуға өңір басшысының орынбасары Арслан Дандыбаев, қала әкімі Нұрлан Құматаев, кәсіпкерлік, энергетика және тұрғын-үй коммуналдық шаруашылығы, өңірлік даму басқармасының өкілдері қатысты.
«Dutch Clean Group (DCG) – суды тазарту саласында 60 жылдан астам тәжірибесі бар халықаралық жетекші компания. Біздің мақсатымыз суды фильтрлеу арқылы адамдардың қолайлы өмір сүруін қамтамасыз ету», — деді компанияның Қазақстандағы өкілдігінің басшысы Алмас Лепесбаев.
Оның айтуынша, DCG серіктестігі заманауи SBR биореактор технологиясы бойынша жүмыс жасайды. Және басқа серіктестіктерге қарағанда біршама артықшылықтары бар:
• жобаны іске асыру кезінде жылдам әрекет ету;
• тиімді бағада кәріз тазарту жүйесін (КТЖ) салып, қысқа уақыт ішінде қолданысқа беру;
• толықтай автоматтандырылған жүйе су тарифінің төмен болуына әсер етеді. Сондай-ақ электр энергиясы айтарлықтай үнемделеді;
• артық тұнбаның түзілуін 40% төмендету арқылы тазартуға қойылатын қондырғының көлемі кішірейтіледі, яғни КТЖ қазіргідей үлкен аумақты алмайды;
• тазартылған су тұнбасын қаланы жылыту, жер құнарын арттыру үшін қайта пайдалануға болады. Бұдан бөлек, шаруашылық, иррегация мәселесін шешуге де мүмкіндік туады.
«Біз Қонаев қаласы жанындағы құрылысқа қолайлы шарттарды қамтитын ашық бизнес-модельді қолдана отырып 100% инвестиция құюға ниеттіміз. Сонымен қатар жоба пайдалануға берілген соң, 5 жылдан 20 жылға дейін техникалық қызмет көрсетуді өз мойнымызға аламыз. Ал қаладағы муниципалитеттер ағынды суды тазарту қондырғыларын салу және күтіп ұстау үшін инвестиция құю орнына DCG компаниясына ай сайын қаржы аударып отырады», — деді Алмас Лепесбаев.
Өкілдік басшысының мәліметінше, керекті құжаттарды реттеу, мемлекеттік сатып алуға қатысу, келісім-шартқа отыру, құрылыс секілді барлық іс-әрекеттер жасалғанда, КТЖ 2 жыл ішінде қолданысқа беріледі.
«Қонаев қаласы КТЖ суын пайдаланып отырған жалғыз қала емес. Шаһар маңында бірнеше елдімекендер бар. Бұған қоса, Алматы мен Қонаев қаласы аралығына 4 қала салуды жоспарлап отырмыз. Сондықтан облыс орталығына келіссөз жүргізуге келіп жатқан инвесторлар ағыны көп», — деді облыс әкімі Марат Сұлтанғазиев.
Басқосу соңында өңір басшысы жауапты мамандарға аталған жобаны ары қарай зерттеп, құжаттарды реттеуді тапсырды.
