Ұлт ұстазы Ахмет Байтұрсынұлының 150 жылдығына орай Алматы облысы Қарасай ауданының Исаев ауылында Алаш арысының есімі берілген жаңа мешіт ашылды, деп хабарлайды Alataunews.kz тілшісі ҚМДБ баспасөз қызметіне сілтеме жасап.
«Ұлт ұстазының есімімен аталған жаңа мешіт ел бірлігі мен ынтымағына қызмет ете берсін. Мешіт – діни уағыз тыңдап, білімін жетілдіріп, сауатымды арттырамын, ұстаздан тәлім аламын деген мұсылмандар үшін тәрбие ордасы», – деп атап өтті Алматы облысының бас имамы Мадияр Пірімқұлов.
Бас имам мешітке Құран Кәрімді және арнайы сыйлықты тарту етіп, мешіт құрылысына үлес қосқан кәсіпкерге алғысын білдірді.
Айта кету керек, мешіт 2019-2022 жылдар аралығында ауыл халқының көмегімен салынды. Оған бір мезгілде 500 кіре алады. Дәрісхана, көлік тұрағымен қамтылған.
